Reclamation project sa Mingla, gisupak

CEBU, Philippines - Dakung supak ang mga residente sa tulo ka barangay sa lungsod sa Minglanilla sa gilaraw nga 100 ka ektaryang reclamation project. Kini ilang gipadayag atol sa gipahigayon nga public hearing kagahapon sa buntag.

Si Bro. Peter Simon Francis Jardinico sa Franciscan Friars of Charity maoy nagsilbing representante sa mga molupyo. Iyang gipadayag nga pakyas sa pagpasabot ang mga opisyales sa lungsod kabahin sa maong proyekto. Daku usab kuno kini og kadaut sa kinaiyahan kun hingpit kining ipatuman.

Matud ni Municipal Administrator Concordio Mejias nga nag-andam na sila og luna alang sa kabalhinan sa mga maapektahang residente kun kinahanglanon.

Iyang gipasabot nga bisan og mga informal settlers ang maapektuhan sa maong proyekto, ila gihapon kining gihatagan og higayun aron makapahiluna og tarong.

Gipasabot usab ni Mejias nga samtang gihimo ang proyekto, dili mahitabo nga mapahawa sa ilang kasamtangang gipuy-an ang mga residente kay dili man sila maigo niini.

Nibahad nang daan si Jardinico nga mupasaka gyud sila og kaso kun ipadayon ang proyekto. Iyang gibana-bana nga anaa sa 3 mil ka mga molupyo ang maapektuhan sa usa lang ka barangay. (BANAT NEWS)