Col. Mallari ibalik sa Bogo City

CEBU, Philippines -  Bag-o na ang hepe sa kapolisan sa Dakbayan sa Talisay human usab nanamilit si Supt. Germano Mallari sa iyang mga sakop ug kang Mayor Eduardo Gullas.

Giubanan ni Mallari ang mohulip kaniya nga si Supt. Aileen Recla sa buhatan sa mayor.

Si Recla nadestino kaniadto sa City Investigation and Detective Management Branch (IDMB) sa Cebu City Police Office (CCPO) ug nabalhin sab sa Police Regional Office-7.

Si Mallari mobalik sa Bogo City Police Station nga maoy iyang assignment sa wala pa siya nahimong hepe sa Dakbayan sa Talisay.

Si Mallari sa iyang bahin nagkanayon nga ingon ana gyud ang dagan sa ilang pagpanarbaho ilabi na sa ilang organisasyon.

Asoy pa niya nga wala siyay supak niini ug andam siya sa bisan unsang tahas nga ihatag kaniya.

Kini kabahin sa gipatuman nga lahugay sa kapolisan sa bag-ong administrasyon gikan sa taas hangtud sa station level. (BANAT NEWS)