Ubang lupon, tanod naswelduhan na

CEBU, Philippines - Pipila ka barangay tanod ug lupong tagapamayapa sa Dakbayan sa Sugbo ang nakadawat na sa ilang honorarium alang sa buwan sa Abril, matud ni City Treasurer Tessie Camarillo.

Matud ni Camarillo nga human sa paghatag sa honorarium duna usab silay giproseso nga laing cash advance aron sa sunod semana makahatag na usab sila og sweldo dili lang sa mga tanod ug lupon apan lakip na sa mga loader ug drivers. Gitataw niini nga matag semana kung unsay mosulod himoan dayon og cash advance sa ilang buhatan aron sa Lunes makasweldo dayon sila.

Sagad sa mga ihatag nila nga honorarium alang pa lang sa buwan sa Abril ug wala pay labot ang gikan sa buwan sa Mayo hangtud Hunyo.

Gipasabot ni Camarillo nga aron maproseso ang paghatag sa mga allowances, ang opisina nga maoy in-charge niini mag-process sa ilang payroll ug i-submit sa accounting alang na sa audit.

Human og audit sa accounting, i-release dayon kini ngadto sa City Treasurer’s Office alang sa pagproseso sa cash advance sa kinatibuk-ang kantidad sa payroll nga ilang madawat.

Ang pagpanghatag og honorarium sa mga trabahante sa barangay gihunong na ni Mayor Tomas Osmeña kinsa nipasalig nga bayran sa siyudad ang allowance nila nga wala madawat sukad pa niadtong Abril hangtud Hunyo.

Ang pagpahunong sa paghatag og financial aid sa barangay subay na sa tinguha sa mayor nga minusan ang gasto sa siyudad kay matud pa daku kaayo kini og alkanse nga niabot og P6 bilyones.

Subay sa desisyon sa mayor daghang barangay ang nagpatabang sa mga konsehal.

Ilang gikabalak-an kay gawas nga daghan ang nawagtangan og trabaho, problema nila kun makasustenir sila sa paghatag sa mga nag-unang panginahanglan ngadto sa katawhan. (BANAT NEWS)