‘Barok’ bag-ong dancer sa CPDRC

CEBU, Philippines - Human giipon sa uban nga piniriso sa Cebu Provincial  Detention and Rehabilitation Center (CPDRC)  ang high profile drug personality nga si Alvaro Alvaro alyas “Barok”, apil na siya karon sa Cebu Dancing Inmates.

Kagahapon si Barok niapil sa practice sa mga inmates sa quadrangle sa maong pasilidad alang sa sikat karon nga sayaw, ang Trumpets.

Matud ni Marco Toral ang consultant on jail matters nga ilang gipaapil si Barok subay sa rehabilitation program sa provincial jail.

Si Vince Rosales ang choreographer sa dancing inmates nagkanayon nga posibleng dili pa kaapil si Barok sa presentasyon karong Sabado atol sa ilang regular nga presentasyon matag katapusang Sabado sa bulan kay aduna pa kini rashes sa iyang lawas ug wala pa maayo sa sakit. Wala pa usab niini masag-o ang tanang dance    steps.

Dugang ni Rosales aduna siyay giandam nga laing sayaw diin plano niya nga hatagan og lead role si Barok apan iya pa kini’ng ipresentar nilang Toral ug jail warden Romeo Manansala. (BANAT NEWS)