Lima nahagba tungod sa drugas

CEBU, Philippines - Lima na usab ka mga tawong gidudahang nalambigit sa ilegal nga drugas ang gipamusil nakalas samtang usa niini ang talandugon ang kahimtang sulod sa pampublikong tambalanan.

Sa Dakbayan sa Sugbo, unang gipusil sulod sa ilang panimalay sa may Salvador Extension, Brgy. Labangon niadtong Miyerkules sa gabii mao si Erwin Quijano, 46. Ang biktima gipusil sa wala mailhing tawo nga misulod sa ilang panimalay ug dali ra usab nisibat human sa pagpamusil. 

Base sa impormasyon gikan sa Punta Police Station si Quijano, ika-12 sa ilang listahan sa mga nalambigit sa ilegal nga drugas sa ilang buhatan.

Ikaduhang pagpamusil nahitabo sa may Colveta 1, Brgy. Basak-San Nicolas, diin usa ka Dario Paez, 50, ang gipusil sa wala mailhing tawo samtang kini galingkod duol sa usa ka kapilya. Matud pa ni Senior Police Officer 2 Romel Bangcog, sa Homicide Section, adunay gipaabot nga trisikad ang biktima dihang kalit kining gipaulanan og bala ug giitsahan og karatola nga may nakasuwat nga “Pusher Ko.” Sumala pa ni Bangcog nitahan na sa iyang kaugalingon si Paez niadtong Hulyo 2 human gilusad ang Oplan Tukhang, nasuta nga namuhi na og baboy ang biktima.

Samtang kagahapon sa kaadlawon usa ka Edwin Casinilio, 49, ang gipusil patay sa wala mailhing tawo sa Sitio Lawis sa Brgy. Lorega-San Miguel ning dakbayan, gidudahan usab nga ilegal nga drugas ang motibo niini.

Sa Dakbayan sa Lapu-Lapu, duha usab ka lalaking nalambigit sa pagpamaligya og drugas ang nakalas human napusilan sa mga polis nga nagpahigayon og buy-bust nga gipangulohan ni Senior Inspector Wayne Magbanua diha sa Sitio Sta. Maria, Brgy. Pusok.

Namatay sa maong operasyon sila si Noel Quintero, alyas Bolantoy, 30,  ug usa ka Jr. Berdijo human gikatahong nanukol sa mga polis dihang nakabantay nga mga otoridad ang nabaligyaan nila og shabu.

Nakuha gikan sa mga nakalas ang mga pinutos nga drugas, kwarta, armas ug bala, pitaka, cellphone ug uban pa.

Samtang kagahapon sa buntag napalgan ang patay’ng lawas sa usa ka Ringgo Rodrigo, 32, sa may eskina Cansaga, sa Lungsod sa Consolacion.

Matud pa ni PO1 Cresencio Saladaga, duty investigator sa maong lungsod adunay samad pinusilan sa ulo ang biktima ug may paskin nga “Traydor sige og sumbong sa Police.”

Ang pangulo sa Police Regional Office-7, Chief Supt. Noli Taliño nimando sa tanang mga police station commanders nga molusad og subsob nga imbestigasyon bahin niining nagsagunson nang mga kaso sa pagpatay sa mga gidudahang drug suspects diha sa ilang mga hurisdiksyon. Rowena D. Capistrano ug Marisol Gecain (BANAT NEWS)