Drainage project sa Naga sunod tuig pa

CEBU, Philippines - Sugdan sa administrasyon ni Naga City Mayor Kristine Vanessa Chiong ang pagpatuman sa ilang drainage masterplan  sunod tuig.

Matud ni Chiong nga kini ang usa sa iyang long-term goal isip mayor sa siyudad nga mao sab ang iyang nakita nga usa sa mga sulbad sa pagbaha sa ilang      lugar.

Asoy pa niya nga aduna silay kasamtangan nga mga kanal apan dili na makasarang sa gidaghanon o volume sa tubig tungod sa kagamay niini hinungdan nga kinahanglan na gyud kini nga padak-an.

Siya niasoy nga mahuman gyud ang ilang master plan karong tuiga ug gani gibuhat na man nila ang declogging dapit sa Poblacion.

Hinuon dili pa siya makahatag og pila gyud ang budget nga gitagana sa siyudad sa daku nga proyekto nga ilang ipatuman.

Laing prayoridad ni Chiong ang paghatag og igong pagtagad sa edukasyon ug saktong pag-atiman sa panglawas sa iyang mga konstituwente. (BANAT NEWS)