Duha napalgan patay sa kanal, kasagbutan

CEBU, Philippines - Paingon na sa pagkadugta ang lawas sa usa ka 35-anyos nga lalaki nga nakit-an ilawom sa kanal sa Fish Port sa Sawang, Dakbayan sa Sugbo pasado alas 6 kagahapon sa buntag.

Giila sa mga tawo sa maong dapit nga usa ka Ronaldo Conchas, ulitawo ug trabahante ang maong patay nga lawas nga gikatahong halos napulo na ka adlaw nga nawala.

Matud ni Police Officer 3 Edario Manatad, imbestigador sa homicide section sa Cebu City Police Office, nga sa pagkakaron dili pa sila makatug-an kung duna bay foul play ang kamatayon ni Conchas.

Wala sab gipadaplin ni Manatad nga gipatay si Conchas ilabi na kay didto kini nakit-an sa ilawom sa kanal.

Lakip sab sa gisubay sa kapolisan ang posibilidad nga lagmit nituyo og adto sa ilawom si Conchas kay kini naila man sa maong dapit nga manguykuyay og sinsilyo sa kanal ug sa kilid sa dalan ug posibling natanggong kini sa ilawom hangtod nahutdan og hangin sa pagginhawa.

Usa ka traysikad drayber ang unang nakabantay dihang iyang natimahoan ang isog nga baho.

Sa iyang pagsubay, lawas sa tawo ang iyang nakita hinungdan nga dali sab kini nga nangayo og tabang sa kapolisan.

Gipaabot na lang sa mga sakop sa homicide section sa CCPO ang resulta sa autopsy sa lawas sa namatay aron hingpit nga masayran kung unsa ang hinungdan.

Samtang laing patay’ng lawas sa wala hiilhing lalaki ang gituohang gi-salvage ang napalgan sa kasagbutan sa Barangay Ugis, Dakbayan sa Danao pasado alas 10  kagahapon sa buntag.

Si Senior Police Officer 3 Rodrigo Roble, imbestigador sa Danao City Police Station, niingon nga ang mga molupyo sa maong dapit mitug-an kanila nga wala gyud sila kadungog og boto sa armas hinungdan sa ilang pagtuo nga patay na kining daan nga gilabay sa maong dapit.

Si Police Officer 1 Jypzy Miro niingon nga ang wala hiilhing lalaki kasarangan lang ang panglawas nga nagsul-ob og T-shirt, nagrelo ug gibanabana nga anaa sa 40 ngadto sa 45-anyos.

Sa pakisusi nga gihimo nasuta nga nakabaton kini og samad pinusilan sa ulo ug uban pang bahin sa lawas. Jojo C. Ugdol ug Romeo T. Limpangog (BANAT NEWS)