Wa mabalaka nga gibawian, di suportaran

CEBU, Philippines - Wala nabalaka ang hepe sa kapulisan sa Cebu City Police Office sa nahimong aksyon sa mayor sa siyudad sa Sugbo nga mikuha sa tanan nga mga armas nga anaa sa iyang mga sakop.

Sumala pa ni CCPO Director PSSupt. Joel Doria nga sa pagkakaron, wala sila magkuwang og armas bisan og gibawian sila ni Mayor Tomas Osmeña.

Iyang gipasabot nga aduna ra gihapoy armas ang iyang mga sakop nga nagagikan sa ilang ulohang buhatan.

Apan kun mahitabo nga magkuwang, plano ni Doria nga mangayo og tabang sa rehiyonal nga buhatan.

Nasayran nga wala pa magkahimamat silang Doria ug Mayor Osmeña ug nagpaabot lang ang pulis sa insaktong panahon.

Gawas sa pagkuha sa mga armas, mibahad usab si Osmeña nga dili na mohatag pa og tabang sa kapulisan ilabina sa mga sakyanan. Apan kagahapon, ang direktor sa PRO-7, PCSupt. Noli Taliño mipahibalo nga adunay 106 ka mga bag-ong motorsiklo ang naabot aron ipang apod-apod sa kapulisan sa rehiyon. Diin 147 ka motorsiklo ang ilang gipaabot ug ang uban gikatakdang maabot sa mosunod nga mga adlaw.

Gawas sa mga motorsiklo, una nang nakadawat ang PRO-7 sa 21 ka mga Mahindra patrol cars nga gikan gihapon sa Campo Crame.

Una nang misaad si DILG Sec. Mike Sueno sa dihang mibisita sa DILG-7 niadtong nakalabay nga adlaw nga andam ang ilang buhatan nga motabang sa kapulisan kun ugaling ang lokal nga ehekutibo sa usa ka lugar, moundang na sa pagsuporta sa pwersa sa kapulisan.

Si Sueno mibahad usab sa mga local chief executives nga andam silang mopasaka og kaso kun magpabaya sa sa ilang trabaho ilabina sa pagsumpo sa kriminalidad ug sa problema sa ilegal nga drugas sa ilang mga lugar. (BANAT NEWS)