Nabalaka sa sagunson nga pagpatay

CEBU, Philippines - Nabalaka na karon ang Commission on Human Rights sa posibilidad nga pagsulbong niining gitawag og vigilantism nunot niining nagkadaghang kaso sa mga napatay nga mga nalambigit sa ilegal nga drugas atol sa mga police operations.

Sukwahi sa mga uwahing nanghitabo nga diin napatay sa mga polis ang mga target nilang drug personality tungod kay “nanukol” ang vigilante motira basta ilang makita ang target nga badlungon sa katilingban.

Apan matud pa ni Leo Villarino, ang Chief Investigator sa Commission on Human Rights 7 nga nahinabi sa Banat News  daghan sila karong giimbestigahang mga kaso nga nalambigit ang mga polis.

Nabalaka sila nga ini og kahilom niini basin unya mosunod ang mga vigilantes aron mawala sa senaryo ang mga polis.

Giangkon ni Villarino nga sa pagkakaron wala kaayo sila maglisod pag-trace kun kinsa nga polis o police unit ang involved sa pagkamatay sa mga drug suspects.

Apan maglisod na sila kun sa higayon kining mga vigilantes ang mosiaw sama sa nahitabo kaniadto nga diin kapin 200 ka tawo dinhi sa Cebu City ang gipamatay pipila ka tuig na ang nakalabay, apan walay bisan usa ka “vigilante” nga nataral sa hukmanan.

Imbestigasyon

Ang CHR mohimo gihapon og mga  Motu Propio Investigation matag adunay drug suspect nga mapatay sa police operations.

Matud pa walo pa lang ka official report diin dunay nangamatay sa police operations ang ilang nadawat gikan sa kapulisan.

Ilang gisusi  kun nasunod ba sa mga polis ang rules of engagement o balido ba ang  operasyon.

Sa pagkakaron, tulo na ka pamilya ang nidangop sa ilang buhatan ug nagpakitabang.

Kagahapon naabtan sa Banat News, sa CHR-7 ang usa ka ginang nga nagpakitabang tungod kay napatay sa mga polis ang amahan sa ilang mga anak kay kuno nisukol.

Giklaro ni Villarino nga dili sila makasilot niadtong mga polis nga makita nilang nakalapas sa mga patakaran, apan mahimo nilang tabangan ang mga reklamante sa kaso ug makarekomendar ngadto sa piskalya o Ombudsman alang sa pagpasang-at og tukma nga kaso.

Lehitimo

Si Police Regional Office 7 (PRO7) director Noli Taliño miingon nga andam silang moatubang sa CHR kabahin sa mga vigilantisms ug sa mga kapulisan nga makapatay in line of duty.

Siya mipasalig nga lehitimo ang ilang mga operasyon nga diin adunay mga napatay ang kapolisan tungod sa pagpanalipod nila sa ilang  kaugalingon.

“Sabi nga nang Chief PNP na ang dapat mabubulagta ay ‘yung mga pusher at hindi yung mga police kaya yun ang specific instruction natin na legitimate yung operation at kung lumaban man ay unahan ng ating mga polis na nag-operate,” dugang pa ni Taliño.

Gipasalig usab nila nga kun adunay mahibaw-ang vigilante ug may ebidensya ilaha gyud kining kasohan.

Due process

Samtang giawhag ni bokal Sun Shimura ngadto kang Presidente Rodrigo Duterte ug kang PNP Chief Ronald Bato Dela Rosa nga ipahunong na ang sunod sunod nga pagpatay sa mga drug personalities.

“Para nako man gud wala na tay kalainan sa mga hayop ani, mura na ta barbaric style of government instead nga isang-at nato ang kaso sa korte, largohon na og patay.

So being the chairman of Peace and Order dili gyud ko sang-ayon, kauyon ani,” matud ni Shimura kinsa anak sa asawa ni Daanbantayan  Mayor Vicente Loot kinsa usa sa gipanganlan ni Duterte nga drug protector. Si Loot kusganong nihimakak sa maong pasangil.

Gihulagway ni Shimura nga makaguba sa imahe sa nasud kining sagunson nga insidente sa mga pagpatay.

Dugang niya nga kuyaw ang nahitabo karon tungod kay posible nga dili tanang napatay may kalambigitan sa gidiling drugas  ug gihimo lang takoban nga nalambigit sa illegal drugs ang mga target.

“Second ang kuyaw ani, kay pwera lang sa police nga maayo.  I’m  talking about reality, what if dili diay nalambigit ang usa ka tawo sa usa ka drug syndicate  and then naa ra syay kontrang polis? Pusilon sa polis and then himo- himoan lang nga apil sa drug syndicate,” matud ni Shimura. Si Shimura  maoy chairman sa Committee on Peace and Order sa provincial board. Rowena Capistrano, Le Phyllis F. Antojado,  Ruchelle Ann A. Suaybaguio ug Kayesha Dyle R. Gastador (BANAT NEWS)