Tulisan napusilan, Maltese gikuotan

CEBU, Philippines - Kritikal ang kahimtang sa giingong notadong tulisan human gipusil samtang nibisita sa iyang igsuon sa Sitio Mananga, Tabunok, Dakbayan sa Talisay kagahapon sa buntag.

Ang biktima nailhan nga si Eduardo Cabalda alyas Ramil Cabalda, 30-anyos, minyo nga taga Sitio Molave, Tabunok samtang ang nagpusil giila lang sa pangan nga Poloy.

Matud ni PO2 Edwin Campomanes sa Talisay City Police Station nga niduaw ang biktima sa iyang igsuon nga babaye dihang kalit lang nibutho sa iyang atubangan ang suspek nga armado ug namusil. Dali nga nisibat ang suspek samtang gidala sa tambalanan ang biktima tungod sa grabeng kahimtang.

Matud ni Supt. Germano Mallari, hepe sa kapolisan sa dakbayan, nga modus sab sa biktima ang magpakaaron-ingnon nga habal-habal drayber apan diay manulis sa iyang pasahero.

Siya nagkanayon nga posibleng adunay daghan na nga naglagot sa biktima hinungdan nga sila na ang nihimo sa pagpanimawos.

Samtang nahanaw ang daku nga kantidad nga salapi sa usa ka Maltese human gikuotan sa usa ka minor de edad sa Sitio Sangi, Tabunok niadtong Lunes sa buntag.

Ang biktima mao si Carmel Sammut, 71-anyos nga nagpuyo sa Deca Homes Subdivision, Tunghaan, Lungsod sa Minglanilla.

Matud ni PO2 Stephen Sefuesca sa TCPS nga nagbarug-barug ang biktima kuyog sa iyang asawa sa nahisgutang lugar samtang adunay gipalit.

Nagsul-ob sa iyang belt bag ang biktima apan sa iyang pagkuha sa pitaka didto na niya nabantayi nga nawagtang na kini kuyog ang sulod P21,000, mga cards ug uban pang mga importante niyang butang.

Giila sa rouges gallery sa kapolisan ang suspek nga nagpuyo Mananga kinsa gipangita aron pangutan-on kabahin sa pasangil batok kaniya. (BANAT NEWS)