Nieskapo kay asawa wa na moduaw

CEBU, Philippines - Gipangita pa ang usa ka piniriso sa Cebu Provincial Detention and Rehabilitation Center nga nakaeskapo niadtong Lunes sa buntag.

Si Arnel Mait, taga Lungsod sa Dumanjug, nagpakaaron-ingnon nga dalaw sa CPDRC ug nakagawas sa prisohan nga wala nabantayi sa guwardiya. Matud ni Romeo Manansala, jail warden sa CPDRC, nga nagsul-ob si Mait og visitors ID ug naggama ug kaugalingong stamp sa CPDRC.

“Matud pa sa blue guard, naa kunoy tatak, naka ID sad kuno, kana atong visitors ID bitaw, nya nakita man to sa atong…gi-review  sa atong CCTV, alas 6:31 sa buntag nakagawas siya,” matud ni Manansala.

Matud niya nikuyog si Mait sa mga dalaw sa CPDRC nga nag-overnight sa provincial jail niadtong Domingo sa gabii ug nanguli Lunes sa buntag.

Gisusi sa kadagkuan sa CPDRC kun nganong nakakuha og visitor's ID si Mait.

Alas 9 sa buntag nagpahigayon og head count ang CPDRC ug didto nasayran nga wala na si Mait sa iyang selda.

Matud pa nga gusto ni Mait nga adtuon ang iyang asawa nga wala na moduaw kaniya hinungdan nga nagtuo kini nga aduna nay laing kapuyo.

Enero karong tuiga si Mait napriso tungod sa kaso sa ilegal nga drugas.

Si Marco Toral, consultant on jail management sa CPDRC, niingon nga giadto ang asawa ni Mait nga nagpuyo sa Argao apan wala kini didto.

Nasayran usab nga anaa sa Dumanjug ang ginikanan sa piniriso hinungdan nga gipabantayan na usab nila didto sa Tangil basin molabang padulong sa Negros sanglit aduna usab kini paryente didto.

Matud ni Toral nga naghatag na usab sila og hulagway ni Mait sa coast guard sa Tangil lakip na sa contact number kun ilang makit-an ang priso.

Si Manansala nagkanayon nga ila na usab gipangita karon ang igsuon ni Mait nga anaa sa Lahug.

Sumala pa ni Manansala nga adunay kalapasan nga nahimo ang tulo ka guwardya sa CPDRC tungod sa panghitabo apan subject pa kini sa imbestigasyon sa Committee on Discipline and Investigation.

Kun mapamatud-an nga adunay kalapasan, posibleng masuspenso gyud ang mga guwardiya.

Nagplano usab ang CPDRC nga ilisan na ang visitor's ID sa CPDRC.

Sabotan usab ni Manansala ug Toral kun angay bang pulihan na ang blue guards nga na-assign sa front desk sa CPDRC. (BANAT NEWS)