Barok gibalhin na og selda

CEBU, Philippines - Nabalhin na sa laing selda ang gitumbok nga high-profile drug personality nga si Alvaro “Barok” Alvaro gikan sa iyang isolation cell sa Cebu Provincial Detention and Rehabilitation Center (CDRC).

Si Barok naipon na kini sa 17 ka common nga piniriso sa cell number 118 niadtong Lunes human sa iyang usa ka buwan nga pag-istar sa isolation cell.

Matud ni Romeo Manansala, jail warden sa CPDRC, nga ang asawa ug duha ka anak lang ang mamahimong makabisita kang Barok lakip na sa iyang abogado.

Pag-abot sa pagkaon, apil gihapon siya sa rasyon sa CPDRC apan kun adunay mohatag og pagkaon gikan sa gawas, aduna gihapoy free tasting sa iyang pagkaon.

Kompiyansa si Manansala nga karon nga anaa na si Barok naipon sa usa ka selda dili kini maka-impluwensiya sa mga piniriso sanglit ila pa kining gikonsiderar nga "bagito" sa selda ug kinahanglan nga mosunod gyud sa polisiya nga ipatuman.

Nahukman sa kadagkuan sa CPDRC nga ibalhin si Barok og selda tungod kay nahuman na man ang usa ka buwan ug sa ilang na-obserbahan wala ray hulga sa kinabuhi sa maong priso sulod sa provincial jail.

"Ang threat naa ra man gyud na sa gawas, wala sa sulod,” matud ni Manansala. (BANAT NEWS)