Managsuon nangalumos

CEBU, Philippines - Duha ka batang managsuon ang nangalumos sa kadagatan sa Brgy. Bagatayam, sa Lungsod sa Sogod pasado alas-10 sa nakalabay nga buntag.

Ang mga biktima giila nga si Paul Joseph Flores Armecin, 7 anyos, ug si Cyril Flores Armecin, 8 anyos, ug nagpuyo sa Sitio Casuhan, Brgy. Lubo sa maong lungsod. Matud pa ni Police Officer 2 Raymund Bacordo, imbestigador sa Sogod Police nga nahinabi sa Banat News gikan namista ang mga biktima ug nihangyo si Cyril sa iyang inahan nga mohunong sa maong dapit aron motubag sa sugo sa lawas.

Ang iyang magulang nga si Concepcion, 15,  maoy nibantay niini apan gikatahong kalit nga midagan ang manghod  nga si Paul Joseph dayong layat sa dagat  apan nitidlom.

Si Bacordo miingon nga kantilado ang dagat nga gitugpahan sa bata.

Pasado alas 12 na sa udto   nakuha ang lawas  sa bata apan pagdala sa  Juan Dosado Memorial Hospital patay na kini.

Nagduda si Bacordo nga lagmit natintal og kaligo si Paul Joseph sa dagat sa pagtuo nga maligo ang iyang magulang nga si Concepcion kay nanghimasa man kini sa daplin sa dagat.

Apan tungatunga sa pagbangotan ug kaguol sa manag-inahan, nagubot na usab sila tungod kay nawani sa ilang panan-aw atol sa komosyon ang manghod sa namatay nga si Cyril ug wala na nila kini igkita.

Samtang nangita sila niini gipahibalo na lang sila sa mga nagpuyo sa maong dapit nga nakit-an ang lawas ni Cyril nga naglutaw sa dagat ug wala na say kinabuhi. Gidudahan nga atol sa komosyon pagkalumos sa maguwang, naratol usab si Cyril ug midagan apan natagak sa kilid sa pangpang sa dagat ug nalumos. (BANAT NEWS)