Trak natagak,4 patay

CEBU, Philippines - Upat ang patay ug duha ang naangol human natagak sa pangpang ang usa ka boom truck sa dihang nawad-an kini og brakes samtang nagdagan sa dulhogon nga dalan diha sa Brgy. Canangcaan sa Lungsod sa Oslob pasado alas-5 sa nakalabay nga hapon.

Ang upat nga namatay mao sila si Junrey Sanchez, 36, Roger Dano, Dolly Dumaog, 22, ug Ginesa Alicanda, 47, pulos mga trabahante sa usa ka construction company.

Samtang ang duha nga naangol mao ang drayber nga si Franklin Arizo, 41, construction worker nga si Joel Sanoy.

Matud pa ni Police Officer 2 Ariel Taguiam sakop sa Oslob Police nga nakaapil sab sa pag-rescue sa mga biktima nga pasado alas 5 sa nakalabay nga hapon ilang nadawat ang tawag sa selpon gikan sa kapitan sa maong barangay nga nagpahibalo sa maong hitabo.

Sa imbestigasyon sa kapulisan nasayran nga gikan sa barangay Canugba sa maong lungsod ang mga biktima nga nagtrabaho sa kalsada ug paingon na unta kini sila mopauli sa Poblacion.

Apan pag-abot sa dulhogon ug kurbadahon nga bahin sa maong dapit gikatahong nawad-an og preno ang sakyanan hangtod nga kini midiretso sa pangpang nga dunay gibana-bana nga 60 ka tiil ang gitas-on ug mibalitok.

Nangalabay sa sakyanan ang mga biktima nga nagsakay sa likod sa boom truck ug ang uban naapil kauban og kahulog sa sakyanan.

Ang mga tawo sa maong dapit daling nitabang kanila apan gumikan sa kalawom sa gikahagbongan ug lisod adtuon kay padung na og ngitngit kagahapon na sa buntag nakuha ang lawas sa duha ka mga biktima nga sila si Dumaog ug Dano. “Ang kadtong upat maoy nadala namo sa hospital pero DOA ang duha, kanang laing duha maoy nadugayan namo og kuha kay naipit sila sa sakyanan, migamit pami og acetylene para maabri ang sakyanan,”matud pa ni Taguiam.

Ang duha ka mga naangol nga gidala sa Oslob District Hospital gibalhin sa Vicente Sotto Memorial Medical Center human nakaangkon og mga bun-og sa kalawasan. (BANAT NEWS)