Vigilantes niboluntaryo mopatay og drug suspects

CEBU, Philippines - Miabot na sa 12 ka mga drug personalities ang napatay dinhi sa Central Visayas niadtong nakalabay nga semana ug napulo niini ang napatay pinaagi sa lehitimo nga operasyon sa kapulisan.

Samtang ang laing duha ka mga napatay nga gidudahang nalambigit sa ilegal nga drugas, gidudahang binuhatan sa mga ‘vigilante’ sumala pa ni Chief Supt. Noli Taliño, direktor sa Police Regional Office-7 nga nahinabi sa Banat News.

Niadtong nakalabay nga semana si Taliño miingon nga nakadawat kini og mensahe sa text gikan sa nagpailang grupo sa mga vigilante nga nangayo og permiso kaniya nga motabang sila sa pagpamatay sa mga drug personalities.

Lakip sa unod sa text message nagtug-an sab kini nga duna’y drug pusher sa ilang barangay nga nagpadayon gihapon sa pagbaligya og drugas sa ilang dapit.

“Sir yong drug pusher sa aming barangay ay tuloy tuloy na nagtutulak at hindi natatakot.  Kami dito nag usap-usap at kung pumapayag kayo kami na lang ang bibira,” sumala pa ni Taliño.

Apan alang ni Taliño trabaho sa kapulisan ang paggukod sa mga badlongon sa katalingban ug dako na kaayong tabang kanila kun adunay impormasyon gikan sa publiko.

“Possible vigilante. We will not encourage that, labag ‘yan sa batas,” tubag ni Taliño. Iyaha hinuong giawhag ang maong texters pinaagi sa pagtubag sa text nga ihatag kanila ang pangalan sa mga drug pushers ug ilang address lakip na ang mga police protectors.

Samtang sa nagpadayon nga kampanya sa kapulisan nga Oplan Tokhang sa Central Visayas miabot 50 mil ka mga tawo ang mitahan sa nagkadaiyang buhatan sa kapulisan lukop rehiyon. (BANAT NEWS)