Plastic ban gihangop sa MCCI

CEBU, Philippines - Gihangop sa mga sakop sa Mandaue Chamber of Commerce and Industry ang gipatuman nga ordinansa sa kagamhanan sa dakbayan sa pagdili paggamit sa plastic.

Si Glenn Soco, presidente sa MCCI, niingon nga ilang gisabot ang katuyuan sa kagamhanan sa pagpatuman sa ordinansa nga mao ang pagsulbad sa pagbaha.

Hinuon si Soco nitataw nga ang mga magpapatigayon nga nagtuman sa maong ordinansa sanglit nagkinahanglan kini og suporta.

Dugang pa niya nga ang pagbaha nagkinahanglan usab kini og hiniusang kasulbaran dili lang sa kagamhanan sa Dakbayan sa Mandaue sanglit ang tubig gikan sa ibabaw nga bahin sa Dakbayan sa Sugbo.

Si Marlene Bedia, coordinator sa MCCI, niingon nga sa wala pa ipatuman ang ordinansa nga nagdili sa paggamit sa plastic, may mga panagtigom na sila nga gihimo sa kadagkuan sa usa ka kompaniya nga gipanag-iya sa Hapon.

Matud ni Bedia nga nagtinguha ang tagdumala sa maong kompaniya sa pagkolekta sa mga plastic nga basura alang sa pag-recycle niini.

Si Mandaue City Mayor Gabriel Luis “Luigi” Quisumbing higpit nga nipatuman sa pagdili sa paggamit sa plastic sa tanang establisemento sa dakbayan ug lakip na sa mga naninda sa merkado publiko.  (BANAT NEWS)