DILG Sec. Sueño, Gob. Davide magtagbo
CEBU, Philippines - Makigtagbo karong adlawa si Interior and Local Government Secretary Mike Sueño kang Gobernador Hilario Davide III ug sa mga opisyal sa Cebu Provincial Anti-Drug Abuse Office.
Matud ni Carmen Remedios Durano-Meca nga ang katuyoan sa tigum mao ang pagpresentar sa probinsya sa mga "best practices" sa kampanya batok gidiling drugas.
Ang Sugbo ang labing unang probinsya nga nakatukod og departamento nga nagtutok sa problema sa ginadiling drugas.
Matud ni Meca nga gusto usab mahibaw-an kun giunsa sa pagpakig-alayon sa probinsya ngadto sa mga non-government organization ug pribadong sektor subay sa programa sa pagbatok sa gidiling drugas.
Kun unsay nahimo nga kalampusan sa CPADAO maoy ilang ipresentar ngadto kang Sueno.
Samtang nihatag og 90 porsiyento nga grado si Meca sa nahimong kalampusan sa administrasyong Duterte sa pagbatok sa ginadiling drugas.
Matud niya nga epektibo ang kampanya sa administrasyon batok sa gidiling drugas pinaagi sa Oplan Tukhang sa kapolisan apan ang problema mao nga wala kaandam ug nakalitan ang mga ahensya sa gobiyerno ilabi na sa kabahin sa rehabilitation sa mga nisurender nga mga drug users. (BANAT NEWS)
- Latest
