Suportado sa mga kapitan

CEBU, Philippines - Usa ka manifesto ang gipirmahan sa 40 ka mga barangay kapitan sa dakbayan sa Sugbo isip 100 porsiyento nga suporta sa kampanya batok sa ilegal nga drugas sa kapulisan.

Ang panagtagbo sa mga kapitan ug kapulisan sa Police Regional Office 7 (PRO-7) giingong walay pamolitika ug tinud-anay ang ilang suporta kay maayo kini nga kampanya nga gipanguluhan nilang Presidente Rodrigo Duterte ug PNP Chief Ronald “Bato” Dela Rosa nga mao usab ang siyagit sa katawhan sa tagsa-tagsa nila ka mga barangay.

Matud ni Cebu City ABC President ug kapitan Phillip Zafra sa Brgy. Tisa nga ilang giimbitar ang tanang 80 ka mga kapitan sa dakbayan apan 40 o katunga lang ang nakatambong aron mahimamat ug makighinabi kang PRO-7 Regional Director PCSupt. Noel Taliño.

Dugang ni Zafra nga aktibo siyang nisalmot sa Oplan Tokhang ug mokuyog siya sa pagpanuktok sa mga balay sa mga drug personalities.

Bahin sa pagbawi ni Cebu City Mayor Tomas Osmeña sa suporta ngadto sa kapulisan, miingon kini respitoon lang ang desisyon sa mayor. Uyon usab kini ipa-ubos sa kinalit nga drug test ang mga kapitan aron magsilbing modelo sa ilang mga konstituwente.

Nalipay si Cebu City Director PSSupt. Joel Doria sa gipakitang suporta sa mga kapitan. Wa siya mawagtangi og paglaum nga mausab pa ang huna-huna ni Mayor Osmeña sa pagsuporta kanila.  (BANAT NEWS)