Tulo na sab nahagba

CEBU, Philippines - Tulo na usab ka mga gidudahang nalambigit sa ilegal nga drugas ug krimen ang napatay sa kapolisan ug ang duha niini giingong biktima sa vigilante. Ang nagkataas nga lista sa mga napatay sa police operations nakapaalarma usab sa Simbahan ug ubang sektor sa katilingban.

Sa Cebu City, usa ka lalaki nga giingong notadong tulisan ug giingong numero uno sa drug watch list sa Waterfront Police Station ang nakalas human kini giingong misukol sa kapulisan sayo kagahapon sa kaadlawon sa may Sitio Looban, Villagonzalo 2, Brgy. Tejero ning Dakbayan sa Sugbo.

Ang nakalas naila nga si Regino Dela Cruz, alyas Otchong, nagpuyo sa maong dapit.

Matud pa ni Police Officer 2 Marlon Gonzales, Desk officer sa Waterfront Police Station adunay nitawag kanila bahin sa armadong lalaki sa maong dapit maong giadto kini nila Senior Inspector Raymund Hortezuela.

Apan dihang gisita si Dela Cruz nibunot kini og armas dayong pabuto ngadto sa mga polis hinungdan nga kini napusilan ug napatay.

Nakuha gikan kang Dela Cruz, ang .38 revolver nga dunay bala, ug dunay nakuhang upat ka kabhang sa caliber nga .9mm sa crime scene.

Matud ni Gonzales, si Dela Cruz, usa ka notadong kawatan ug tulisan base sa record niini diha sa ilang buhatan ug nalambigit usab sa ginadili nga drugas.

Samtang usa ka gidudahang kawatan ang gipusil patay sa wala mailhing mga tawo diha sa Sitio Tuburan, Brgy. Punta Princesa ning dakbayan. Ang nakalas naila nga si Alex Reyes, 39. Matud pa ni Senior Police Officer 3 Jayme Del Mar padayon pa ilang imbestigasyon pag-ila kung kinsa ang nipatay sa biktima.

Samtang blangko pa gihapon ang kapolisan sa Presinto 3 sa Mandaue City Police Office (MCPO) mahitungod sa pagpusil patay sa usa ka gidudahang drug pusher diha sa Brgy. Jagobiao, Dakbayan sa Mandaue sa miaging gabii.

Si Police Officer  1  Cresenciano Saladaga sa Consolacion Police Station mikompirmar nga ang gipatay nga si Lord Casipong, 31, nagpuyo sa Brgy.  Pulpogan  sa maong lungsod ug nalambigit kini sa pagpayuhot og shabu.

Matud pa niya nga gipatay kini dihang namisita sa iyang higala sa Brgy. Jagobiao sa Dakbayan sa Mandaue. Si Police Officer 1 Glenn Borbalba sa Presinto 3 sa MCPO miingon nga naglingkod lang ang biktima nga nakigtabi sa iyang higala   sa Sitio Lourdes, Brgy. Jagobiao dihang gipusil sa luyong bahin sa iyang ulo sa wa mailhing tawo.

Sa laing pagpamusil, nalandig sa tambalanan ang usa ka gipasanginlang tigpayuhot og ilegal nga drugas human siya napusilan sa mga polis atol sa buy- bust operation sa Brgy. Langtad  sa Dakbayan sa Naga niadtong Domingo sa buntag.

Ang samaron mao si Sherwin Saloceran, 32, taga Inuboran  kinsa nakaangkon og samad pinusilan sa tuo nga bukton, dughan ug duha sa iyang paa. Si PO3 Gilmer Noval mibutyag nga nakabantay ang suspek nga polis iyang gibaligyaan og drugas ug nisuway pagbunot  sa iyang armas maong giunhan nila kini pagpusil.

Lima ka gagmay nga paketeng shabu, P500   ug .38 nga snub nose revolver nga adunay duha ka bala ug  drug paraphernalia ang nakuha kaniya.

Apil sa nasikop sila si Rubin Dacalos, 51, tag-iya sa balay nga giestaran ni Saloceran ug ang uyab niini nga si Shabie May Canque, 20.

Si Noval nagkanayon nga bagsakanan sa ilegal nga drugas ni Saloceran si Dacalos.

Naalarma

Mga nagkadaiyang sektor ilabi na ang Simbahan ang nabalaka sa sagunson nga pagpatay sa mga gidudahang drug suspects ug kriminal sa mga police operations.

Si Cebu Archbishop Jose Palma sa Archdiocese of Cebu nanawagan nga adunay mangusog paghimo og imbestigasyon kabahin niini ilabi na nga adunay mga pagpatay nga giingong gisakyan sa uban.

Sumala pa ni Palma, mas maayo masayran gikan sa mga nakalas kung pilay drug related, pilay nasakpan sa actual nga position, pilay nisukol o tinuod ba gayud nga dunay armas, o kaha hulga o andam ba gayud mopatay ang tawo nga nalambigit sa drugas ngadto sa iyang isig katawo, tungod kay basin unya ug adunay mga laing tawo nga nisakay sa programa sa gobiyerno.

Dugang pa sa Arsobispo dili mahimong ibutang sa mga kamot ang pagkab-ot sa hustisya.

“We hope nga dunay investigation and the proper implementation of the law,” matud pang Palma.

Si Jayme Paglinawan, ang pangulo sa Bayan-Central Visayas miingon nga mas maayong tan-awon usab ni Presidente Rodrigo Duterte nga kining ubang gipamatay dili ba pagpanghipos sa mga sindikato sa ilang mga sakop nga gusto nang magbag-o ug nahadlok silang mayagyag sa publiko kun si kinsa sila.  (BANAT NEWS)