Siyam nitahan, usa naaktuhan nagsuyop
CEBU, Philippines - Nitahan ang siyam ka tawo nga niangkong mogamit og shabu sa Oplan Tukhang sa kapolisan sa Presinto 1 sa Mandaue City Police Office (MCPO) ug usa sab ang naaktuhan gyud nga nagsuyop og shabu hinungdan nga gidakop ug gibalhug sa detention cell alas 8 pasado ang takna sa niaging gabii.
Si Police Officer 3 Jayson Flores sa Presinto 1 niila sa nadakpan nga si Liomedez Lumapas Zafari, 39, taga Barangay Mantuyong ug nakuha gikan niini ang mga drug paraphernalia nga gigamit sa pagsuyop og shabu.
Dugang ni Flores nga ang ilang team unang nisulod sa kabalayan sa Barangay Guizo nga maoy hinungdan sa pagtahan sa siyam ka tawo.
Matud ni Flores nga sa mga nitahan maoy labing tiguwang ang 50-anyos ug ang labing batan-on mao ang 22-anyos nga lalaki nga taga Guizo kinsa pulos na mipirma sa ilang panaad nga hingpit na gyud nga mag-usab sa ilang kaugalingon ug nisaad nga dili na mobalik sa bisyo.
Si Flores niingon nga ilang gipadayon ang operasyon alas 8 sa samang gabii ug ilang gituktok ang panimalay nga gipanag-iya ni Zafari.
Padulong unta sa pagtuktok sa pultahan ang kapolisan sa panimalay ni Zafari apan ilang namatikdan nga wala kini timik sa sulod sa panimalay apan dihang ilang gitan-aw ang sulod niini ilang nakita si Zafari nga nagpadayon sa pagsuyop og shabu hinungdan nga ilang gisikop. (BANAT NEWS)
- Latest
