Bantay dagat, Mananga task force buhion

CEBU, Philippines - Umulon pagbalik ni Konsehal Antonio Bacaltos Jr. sa Dakbayan sa Talisay ang Fisheries Sea Ecological Care (FISECA) o bantay dagat ug ang Mananga Task Force.

Kini human napasagdan lang ang maong opisina sa niaging administrasyon hinungdan nga daghan sa mga ilegalista sa kadagatan ug kasapaan ang nagpahimulos ug nag-among-among sa kalikupan.

Gani si Bacaltos nakapadayag kaniadto nga niabot na lang sa unom ka personahe ang nadestino sa FISECA nga maoy mobantay sa kadagatan ug wala na sab siya nasayud kun ang Mananga Task Force naglihok pa ba sa niaging adminis-trasyon.

Si Bacaltos kinsa maoy chairman sa komitiba sa kalikupan ang nipapasar og resolusyon sa pag-umol sa duha ka buhatan.

Walay supak ang konseho ug napasar kini sa niagi nilang session.

Si Bise Mayor Alan Bucao nibutyag nga sa gihimo nilang caucus meeting ilang nakita ang ka mahinungdanon sa maong mga buhatan tungod usab sa report nga gipakita ni Bacaltos kanila.

“Amo gyud dayon nga gitimbang-timbang ang gi-report hangtud nga ni-pass og two resolutions,” nagkanayon si Bucao. (BANAT NEWS)