Text nasakpan, lalaki nagpusil sa ulo
CEBU, Philippines - Nalandig sa tambalanan ang 18-anyos nga lalaki human kini nagpusil sa iyang ulo atubangan sa iyang 19-anyos nga kapuyo nga mabdos sa Barangay Basdiot, Moalboal pasado alas 2 sa nakalabay nga hapon.
Ang lalaki giila nga si John Michael Abangan, nagpuyo sa maong dapit, samtang ang iyang kapuyo naila nga si Anabelina Sabanal, pito ka buwan nga mabdos.
Base sa imbestigasyon nga gihimo sa Moalboal Police nga gipangulohan ni Police Officer 3 Roland Rodriguez ug kaubanan nasayran nga nagpusil sa ulo si Abangan human nag-away ug ang kapuyo.
Nasayran sa kapolisan nga nagsugod ang away sa duha human nabasahan sa babaye gikan sa cellphone sa lalaki ang text message sa laing babaye.
Kalit lang nikuha og .38 revolver si Abangan ug dayon pusil sa iyang ulo bisan gisuwayan pa unta kini og pugong sa babaye.
Dali nga gidala sa Badian District Hospital si Abangan ug gibalhin sa Vicente Sotto Memorial Medical Center diin padayon pa nga gi-obserbaran sa doktor.
Narekober sa mga polis ang .38 revolver nga gituohang gigamit sa lalaki sa paghikog ingon man usa ka basiyo sa bala ug usa ka deformed slug.
Wala hinooy nakitang foul play ang kapolisan sa ilang inisyal nga imbestigasyon. (BANAT NEWS)
- Latest