JVR, John Yre way separation pay?
CEBU, Philippines - Posibleng dili makakuha sa ilang separation pay sila si kanhi mayor Johnny de los Reyes ug iyang anak nga si kanhi city administrator John Yre de los Reyes.
Kini human pabilin pa silang pakyas sa pag-uli sa mga ekipo ug mga sakyanan nga gipang-isyu kanila sa siyudad samtang sila pa ang naa sa katungdanan.
Matud ni Joan Vebar, pangulo sa General Services Office (GSO) sa dakbayan, nga nilingkod na lang ang bag-ong administrasyon pero wala pa gihapon nakaasikaso sa mga papeles ang mga kanhi opisyal.
Si Vebar niingon nga aduna pay mga kagamitan sa opisina ug sakyanan sama sa pick-up truck ang wala mauli ni JVR samtang laptops ug cellphone ug ang rescue vehicle ang kang John Yre. Nahimong kontrobersyal ang P3.5 milyones nga rescue vehicle human nipasaka og kaso ang usa ka concern citizen batok sa kanhi mayor ug sa iyang anak sa pasangil nga overpriced ang maong sakyanan.
Gani sa niaging mga buwan, gipangita sa konseho ang rescue vehicle tungod sa kalit nga pagkawagtang niini apan nasuta nga tua diay sa kompaniyang ayuhanan og mga sakyanan.
Si Vebar nitataw nga si John Yre ang ni-request para sa inventory sa tanang na-isyu diha sa iyang opisina apan hangtud karon wala pa makauli sa laptop ug cellphone ang kanhi opisyal.
Asoy pa niya nga kinahanglan nga iuli sa kanhi mga opisyal ang mga giisyu diha kanila aron sila makadawat sa ilang separation pay gikan sa siyudad.
Gawas pa niana ang Commission on Audit (COA) ang mangita sab sa mga butang nga iya sa gobiyerno. (BANAT NEWS)
- Latest
