‘Pork barrel’ sa Talisay giwagtang

CEBU, Philippines - Giwagtang na sa konseho sa Dakbayan sa Talisay ang paghatag og ayudang pinansyal ngadto sa kabarangayan pinaagi sa Legislative Assistance Fund (LAF).

Kini human ilang nakita nga unconstitutional ang maong paagi sa paghatag tungod kay nahisama kini sa Priority Development Assistance Fund (PDAF) nga napahimuslan sa mga senador ug kongresista.

Si Bise Mayor Alan Bucao nagkanayon nga giputol na sa probinsya sa Sugbo ang ingon ini nga proseso human ang Korte Suprema nidesisyon nga ilegal ang maong paagi.

Matud ni Bucao nga kun aduna man gani pangayuong pinansyal ang matag barangay, adto na sila moderetso sa konseho ug ang konseho na sab ang mopasa sa ilang hangyo ngadto ni Mayor Eduardo Gullas.

Ang LAF nahimo panahon sa administrasyon nila ni kanhi mayor Johnny de los Reyes ug ni kanhi bise mayor Romeo Villarante.

Ang matag konsehal ang adunay usa ka milyon ka pesos nga LAF nga puwedeng mahatag ngadto sa kada barangay nga mangayo og ayuda alang sa “soft” o “hard project” nga gusto nilang ipatuman.

Nahimo ang LAF sulod sa usa ka tuig apan giputol kini ni delos Reyes tungod sa bati niyang relasyon ngadto sa konseho.

Asoy pa ni Bucao nga sa pagkakaron kun adunay mga hangyo ang matag barangay adto sila moduol sa mga konsehal nga hingtungdan sa ilang gikinahanglan ug ang konsehal na ang mo-sponsor og resolusyon sa paghangyo sa mayor nga mohatag og ayudang pinansyal. (BANAT NEWS)