Pito na usab ang napatay

CEBU, Philippines - Unom ka mga tawo ang napatay sa managlahing anti-illegal drugs operations ug anti-criminality operation sa kapolisan dinhi sa Sugbo sukad sa miaging adlaw ug kagahapon, samtang dunay usa nga gipatay sa gidudahang ‘vigilante’ tungod sa pagpamaligya og illegal nga drugas.

Sa Dakbayan sa Danao, tulo ka tawo ang patay sa police operation nga gihimo diha sa Sitio Pagutlan, Brgy. Maslog  nga gipangulohan ni Senior Insp. Alejandro Batobalonos, hepe sa Danao City Police Station. Patay atol sa engkuwentro sila si Wilfredo Quimbo, alyas Tata Bungi, target sa kapulisan nga anaa sa top ten drug personalities sa Danao ingon man ang iyang duha ka mga kauban nga sila si Jerome Austria ug Benjamin Pepito.

Si Batobalonos nga nahinabi sa Banat News nagkanayon nga usa sa gihatagan og tsansa sa Oplan Tukhang si Quimbo ug kini mitahan sa iyang kaugalingon niadtong Hulyo 10.

Nibalik pamaligya

Apan nasayran ni Batobalonos nga nibalik  gihapon sa ilegal nga negosyo ug giingong nanganti nga mosukol kini kun sikupon.

“Ang ingon niya nga sa makauna lang daw, basta mosukol gyud daw siya sa mga polis kay kadtong mi-surrender na siya murag napugos ra to,” matud pa ni Batobalonos.

Atol sa buy-bust operation nakadagan si Quimbo ug nipabuto sa iyang armas ngadto sa mga polis, tungod kay ngitngit ang lugar nagkasinukliay og bala ang mga polis ug grupo sa suspek.

Naigo sa dughan si Police Officer 1 Clester Alcansado apan swerte nga nagsuot kini og bulletproof vest ug maoy nakaluwas sa iyang kinabuhi.

“Pwerting ngitngita sa area. Ang gi-target namo ini’g balos og pusil (didto) kung asa ang siga sa buto sa armas nilang Quimbo,” sumala pa ni Batobalonos.

Narekober sa mga polis gikan ni Quimbo ang usa ka .45 caliber pistol, marked money nga P200 ug usa ka medium size sa shabu, samtang gikan ni Pepito nakuha sa mga polis ang usa ka .38 revolver, usa ka medium size sa shabu ug usa sab ka .357 revolver ang nakuha gikan ni Austria.

Nisukol

Samtang sa Dakbayan sa Carcar, napatay sab sa mga sakop sa Carcar City Police ang usa ka nagbaligya og shabu  nga giingong unang namusil sa mga polis atol sa buy- bust operation diha sa Sitio Katugasan, Brgy. Perrelos sa nakalabay nga hapon.

Dead on arrival sa Carcar Provincial Hospital si Philip Tañica, alyas Denden nga nagpuyo sa maong dapit nga nakuhaan og .45 caliber pistol, magazine ug mga bala, mga pinaketeng shabu ug ang buy-bust money nga P500.

Samtang sa Cebu City,  tulo ang patay sa police operation usa kanila ang giingong gialarma kay armado ug nakuhaan usab og pakete sa shabu ug armas.

Armado

Dead on the spot ang usa ka 22-anyos nga si Gerald Cediño human napusilan sa iyang silingan nga polis nga si SPO2 Renante Nioda, sakop sa CCPO-SWAT diha sa Sitio Mohon, Brgy. Tisa II ning dakbayan.

Matud pa nga gireklamo si Cediño sa iyang mga silingan kay armado kini ug adto nisumbong kang Nioda ug  PO2 Arnold Cabildo nga sakop usab sa CAIDSOTG sa CCPO.

Matud pa ni Police Officer 3 Edario Manatad, imbestigador sa Homicide Section sa CCPO nga nahinabi sa Banat News sa pagresponde sa duha giimbitar nila si Cediño padung sa police station.

Apan gikatahong kalit milugnot si Cediño ug mibunot sa iyang gitagoan nga revolver maong gilayog kini  ni Cabildo maong nagdumogay ang duha, dihadiha si Nioda giingong nakakita nga nabutang sa peligro ang kahimtang sa iyang kauban maong iyang gipusil ang suspetsado sa dughan ug abaga.

Ang mga sakop sa Cebu City Emergency Medical Services mitabang sa suspetsado apan nakabsan kini sa kinabuhi.

Narekober sa mga polis gikan ni Cediño ang usa ka .38 snub nose revolver nga dunay upat ka mga bala, usa ka medium size paketeng gituohang shabu ug drug paraphernalia.

Si Manatad miingon nga base sa nakuha nilang impormasyon si Cediño nalakip sa top 10 drug personalities nga gipanid-an sa Punta Princesa Police Station.

May warrant

Laing napatay sa mga sakop sa Guadalupe Police Station sa CCPO ang usa ka Judeniño Sombreno nga giingong adunay warrant of arrest sa kasong robbery nga ilaha untang dakpon apan nakigpinusilay hinuon.

Nahitabo kini diha sa Sitio Kalubihan-Banawa sa maong barangay kagahapon sa udto. Samad sa dughan ug ulo ang naangkon ni Sombreno nga nakaingon sa kamatayon niini.

Ang hepe sa Guadalupe Police nga si Chief Insp. Jose Gesto nga nahinabi sa Banat News nagkanayon nga samtang gisilbi sa iyang mga sakop ang warrant of arrest sa kasong robbery hold-up batok sa suspetsado midagan kini ug namusil sa mga polis.

Dali siyang gigukod hangtod nga misulod sa usa ka balay ang suspetsado ug didto na kini na-corner sa mga polis, apan bisan pa niini, wala gihapon kini mitahan hangtud nga napusilan.

Matud pa ni Gesto nga ang suspetsado nalambigit  usab sa negosyo sa drugas sa ilang dapit gawas sa pagkalambigit niini sa pagpanulis ug lider-lider sa usa ka criminal gang sa maong barangay.

Nakuha sa mga polis gikan sa suspetsado ang usa ka .38 snub nose revolver nga dunay mga bala.

Gipaskinan

 Samtang usa ka  Mark Gil Banzon, 24, ang gipusil patay atubangan sa may T. Padilla Public Market sa Brgy. T. Padilla, Cebu City niadtong Sabado sa hapon sa duha ka mga lalaking luwan og motorsiklo.

Matud pa sa pipila ka mga saksi, nangutana ang gunman sa tapok sa mga estambay kun kinsa kanila si Gil, sa dihang nitubag ang biktima kalit kining gipusil kaunom ka higayon sa iyang kalawasan.

Nakuha sa crime scene ang unom ka kabhang sa bala sa kalibre .45 ug gibinlan kini og paskin nga adunay nakasuwat nga "Pusher ko ayaw Sunda."

Padayon pa ang kapolisan sa pag-imbestigar sa maong kaso lakip na ang pagkatawo sa biktima ug kun si kinsa ang mamumuno niini. (BANAT NEWS)