Pangandam sa katalagman

CEBU, Philippines - Mikabat ngadto sa 400 ka mga emergency responders gikan sa 27 ka mga Local Government Units (LGU) ug 10 ka team sa Search and Rescue (SAR) ang nabansay na sa Cebu Provincial Disaster Risk Reduction and Management Office (PDRRMO) karong tuiga.

Niining ulahi lang, atol sa gipahigayon nga PDRRM Full Council Meeting, si Gobernador Hilario Davide III kinsa maoy chairman sa PDRRMC nagkanayon nga target sa probinsiya ang “zero casualty” atol sa mahitabong kalamidad.

Si Davide mipadayag sa iyang kabalaka ngadto sa mga delikadong lugar sa panahon kun adunay bagyo nga moigo ug ilabi na nga nagsugod na ang ting-uwan. Subay niini, ang PDRRMO mipadayag sa community-based information, monitoring ug evaluation system.

Si Eric Lopez sa PDRRMO Training Division nagkanayon nga naka-develop sila og community-based information, monitoring ug evaluation system diin dunay 400 ka aktibong responders gikan sa 27 ka mga LGU ang miapil.

Dugang ni Lopez nga niining ulahi lang, naka-organized ug nakabansay na sila og napulo ka SAR teams.

Gawas niini ang PDRRMO nag-engage usab og 31 ka functional ka ER groups gikan sa pribadong sector, LGUs ug non-government organizations. Matud usab ni Lopez nga adunay 24-oras nga operation center nga andam sa umaabot nga contingency.

Nunot niini, mikabat sa 150 ka estudyante ang napaubos sa pagbansay kabahin sa Basic Life Support (BLS) ug paggama og school-based ER team. Kini isip tubag sa panawagan sa pag-apil sa mga estudyante sa disaster risk reduction (DRR).   (BANAT NEWS)