Mga drug users, pushers sa Badian nitahan

CEBU, Philippines - Dul-an sa 700 ka mga tawo nga nalambigit sa ilegal nga drugas ang nitahan sa ilang kaugalingon sa Badian Police Station subay sa gipahigayon nga Operation Oplan Tokhang sa kapulisan sa 29 ka barangay sa maong lungsod.

Matud pa ni Police Officer 1 Johannes William Cardona, nakig-alayon ang ilang buhatan sa mga barangay kapitan nga mopahigayon sila og symposium sa katawhan nga nalambigit sa ilegal nga drugas nga motahan sa ilang kaugalingon mintras aduna pa silay panahon ug gihatagan sila’g kahigayonan nga magbag-o.

Sumala pa ni Cardona, sukad niadtong Hulyo 1 hangtud kagahapon sa buntag 679 na ka mga tawo ang nitahan sa ilang kaugalingon ug nipasalig nga magbag-o na.

Gitug-an ni Cardona, ang 657 nga nitahan mga drug users, 14 ang pushers diin lima niini ang anaa sa top ten watch list nga nalambigit sa ginadili nga drugas ug laing walo ang planter sa marijuana ang nilakip sa pagtahan.

Gibutyag ni Cardona nga posibleng mosaka pa ang gidaghanon sa ihap sa mga tawo nga nitahan tungod kay padayon man gihapon ang ilang Oplan Tokhang.

Gidasig ni Cardona, ang mga tawo nga nalambigit sa ilegal nga pagpamaligya og drugas nga motahan sa ilang kaugalingon tungod kay subsob ang ilang kampanya sa ilegal nga drugas.

Sa laing bahin, nasikop ang unom ka mga tawo diin upat niini mga lalaki ug duha ka babaye sa gipahigayon nga buy-bust operations sa managlahing lugar sa lungsod sa Pinamungajan.

Ang mga nasikop mao sila si Jesus Gines alyas Kano, 32, nga taga Sitio Tubod, Brgy. Poblacion. Lakip nga nasikop ang iyang mga kauban nga sila si Lex Delima, 35, ug  Alice Paloma, 43, pulos taga Brgy. Mangoto sa  nahisgutang lungsod.

Gamit ang P200 nga buy-bust marked money gipalitan sa poseur buyer si Delima diin si Gines ang giingong nitunol sa drugas hinungdan sa ilang pagkasikop ug nakuhaan og unom ka gagmay nga pakete sa shabu nga nitimbang og 0.30 gramos o kapin sa P3 mil ang balor.

Samtang nadakpan usab sa kapulisan ang target nga si Rannie Albano, 38, taga Brgy. Tutay  kauban sila si Shanette Janine Caballero, 22, taga Siyudad sa Toledo ug usa ka Allan Peña, 25, nga taga  Poblacion, Pinamungajan.

Nasakmit gikan sa tulo ang gagmay nga pakete sa shabu nga nitimbang og 0.21 ka gramos samtang nakuhaan si Albano og usa ka .45 nga kalibre sa  armas nga adunay duha ka bala.

Didto  sa Sitio Lubo, Brgy. Captain Claudio sa Siyudad sa Toledo, 250 ka mga punoan sa marijuana ang gilarot sa mga sakop sa Criminal Investigation and Detective Group-7 nga gipangulohan ni Chief Insp. Rene Kyamko.

Tulo usab ka mga gidudahang nananom niini ang nasikop nga sila si Ronnee Bacon, Alejandro Abadiano ug Anastacio Cabigas.

Sila si Bacon ug Abadiano ang gidudahan nga maoy nagtikad ug nag-atubang sa mga punoan sa marijuana.

Samtang si Cabigas nga anaa usab sa lugar atol sa gipahigayong operasyon   nasakmitan og armas nga adunay unom ka bala.  (BANAT NEWS)