Artsideyosisis gusto nga motabang sa mga nitahan

CEBU, Philippines - Si Cebu Archbishop Jose Palma andam makigtagbo sa tanang ahensya sa gobiyerno aron pagdalit kun unsa ang matabang sa Simbahan niining kampanya batok sa ilegal nga drugas pinaagi sa Oplan Tokhang sa kapulisan.

Matud pa sa Arsobispo atol sa ilang sunod nga tigum sa mga kaparian tinguha niyang isugyot ang pagdasig sa mga parokya nga makighiusa sa tanang ahensya sa gobiyerno, mga negosyante, nasudnong kagamhanan ug mga non-gvernmental organizations aron tukion kun unsay angay nilang matabang sa mga nitahan sa ilang kaugalingon.

Sumala pa ni Palma buot nilang makatampo ang simbahan sa pagbag-o sa mga nitahan gikan sa rehabilitasyon hangtud na sa pagtabang kanila nga makapanginabuhi sa tinarong nga paagi.

Matud pa ni Palma nga nakita niya ang giatubang nga problema karon sa gobiyerno kun unsaon pag-atiman ning nagsugwak nga mga nitahan nga tiggamitan og ilegal nga drugas.

Sumala pa niya, kinahanglan nga magtinabangay ang tanan aron masiguro ang kalamposan sa kampanya.

"I know it's a complex problem, pero ang akong pagtuo kung magtinabangay kita ug adunay panaghiusa something could be done to address the issue," matud sa Arsobispo.  (BANAT NEWS)