Laing duha nahay-ad tungod sa drugas

CEBU, Philippines - Duha ka mga gidudahang tigpayuhot og ilegal nga drugas ang nadugang sa taas nga listahan sa mga gipatay o mga napatay atol sa police anti-illegal drugs operations dinhi sa Sugbo.

Didto sa Brgy. Bungoyan sa Lungsod sa Borbon, patay ang usa ka Kenneth Dosdos, 33,  nga giingong drug pusher sa lugar ug usa sa mga unang nitahan dihang gipatuman ang Oplan Tukhang.

Apan giingong mibalik kini sa pagpamaligya og shabu  hinungdan sa gilusad nga operasyon sa kapolisan apan niresulta hinuon sa iyang kamatayon dihang giingong nisukol sa mga polis. Si Senior Inspector Audie Pelayo nga maoy Officer-In-Charge sa Borbon Police Station maoy nangulo sa buy-bust operation miingon nga ilaha usab nadakpan ang mga kakunsabo ni Dosdos nga sila si Ritchie Dosdos, 26, ug Arvin Mondejar.

Samtang usa ka gidudahang pusher ang gipusil patay sa duha ka wala mailhing mga lalaki diha sa dalan Juan Luna, Brgy. Looc sa Dakbayan sa Danao sa miaging gabii. Ang gipatay mao si Ronie “Saddam” Ponce, 25. Matud pa ni Police Senior Inspector Alejandro Batobalonos, hepe sa Danao City Police Station nga naglingkod sa gawas sa ilang balay ang biktima dihang  gipusil ug gipaskinan og : “DRUG PUSHER AKO WAG NYU AKUNG TULARAN.”

Matud ni Batobalonos si Ponce usa sa ilang gi-tokhang apan giingong wala mosanong. Sumala pa ni Batobalonos, ilaha unta nga giplano nga sikupon kini pinaagi sa buy-bust operation apan naunhan sila sa duha ka wala mailhing mga lalaki nga mipatay kang Ponce.  (BANAT NEWS)