Sindikato puhagon

CEBU, Philippines -  Human sa pagkapatay sa gipasanginlang numero unong drug lord sa Cebu City nga si Jeffrey “Jaguar” Diaz nagplano ang Police Regional Office-7 nga puohon ug ibton gyud ang kinaugatan sa organisasyon niini ug sa iyang mga kakunsabong drug lords.

Kini samtang ang Arsobispo sa Sugbo nga si Jose Palma subling mipadayag sa iyang dakong pagsupak sa extra-judicial killings samtang ang Catholic Bishops Conference of the Philippines usab miisyu og pamahayag nga naalarma na sila sa sagunson nga pagpatay sa mga gidudahang kriminal dinhi sa nasud.

Laruton gyud

Ang direktor sa Police Regional Office-7 Chief Supt. Patrocinio Comendador Jr., naglaraw nga puhagon ang tanang makinarya, koneksyon, protektor, apparatus ug hasta ang pagbawi pabor sa gobiyerno sa mga bahandi ug kwarta ni Diaz diha sa bangko pinaagi sa Anti-Money Laundering Council.

Tumong niini nga dili na mosanay pa ang ilegal nga negosyo sa ilegal nga drugas dinhi sa Sugbo.

Matud pa ni Comendador aduna na silay mga pangalan ug mga lokasyon sa mga kauban ni Diaz.

Kagahapon sa buntag atol sa flag raising ceremony giawhag ni Comendador ang iyang mga sakop nga hingusgan pa ang kampanya batok drugas mintras anaa kanila karon ang “momentum” human sa sunod-sunod nila nga mga operasyon.

Atol sa pagkapatay kang Diaz didto sa Las Piñas City ,  si Alvaro Alvaro o mas naila nga alyas Barok mao gyud unta ang dakponon sa mga sakop sa Regional Special Operations Task Group-7 pinasikad sa warrant of arrest.

No.1 drug lord

Sumala pa ni Sr. Supt. Clifford Gairanod ang direktor sa Cebu Provincial Police Office  si Barok mao karon ang kinadak-ang drug lord sa probinsya sa Sugbo. Ning bag-ohay lang nila nasayran nga gikan  kang Diaz ang supply sa shabu ni Barok.

Si Barok maoy gidudahang may kalambigitan sa kamatayon sa hepe sa lungsod sa Poro nga si Sr. Insp. Jonas Tahanlangit di pa lang dugay ug sa pag-ambush patay sa usa ka polis  sa Danao pipila ka tuig na ang nakalabay.

Atol sa engkwentro sa Las Piñas nakaikyas si Barok apan napatay ang mga kuyog niini nga sila si Diaz ug si Paul Vincent Morales.

Nasagmuyo

Samtang ang hepe sa Regional Intelligence Division-7, Supt. Rex Derilo nasagmuyo sa pamahayag sa usa ka kanhi opisyal sa NBI dinhi sa Visayas nga daw nagduda sa operasyon sa kapulisan nga gikamatay ni Diaz kay daw gipahilom kini. Hinoon nakasabot si Derilo nga naa g’yuy manggawas nga komento sa ilang operasyon ug andam nila kini nga atubangon. “To the police implicated in the illegal drugs you cannot get away with it, dinamay ‘nyo kami,” bahad pa ni Derilo.

P100 mil gihatag

Sa laing bahin, gihatag na ni Cebu City incoming Mayor Tomas Osmeña sa RID ang P100 mil nga ganti tungod sa pagpatay nila kang Diaz. Ang kuwarta gitunol ni Osmeña ngadto kang Derilo uban ni Supt. George Ylanan.

Uban nila ni Derilo ug Ylanan ang pipila ka agents nga maoy nag-surveillance sa kalihukan ni Alvaro.

Ang P50 mil sa ganti ilang gamiton pagpalit og kahimanan sa  police operations samtang ang laing P50 mil gastohon kun may  magpatabang sa pagpa-rehabilitate sa  mga adik.

Extra-judicial killings

Samtang sa iyang bahin, si Cebu Archbishop Jose Palma miangkon nga usa ka seryosong problema ang drugas sa katilingban ug sa kadaot nga ibunga sa mga nalambigit niini.

Apan gihimug-atan ni Palma nga bisan pa man sa maong problema, ang pagtulon-an sa Simbahan nagdili sa pagbutang sa balaod sa kaugalingong kamot. Samtang tuod gidayeg sa CBCP ang gipahingusgang krusada kontra krimen, naalarma usab sila sa nagkataas nga listahan sa gipamatay nga gidudahang kriminal nga miabot na og 34 ang napatay human sa eleksyon.

Si Lingayen-Dagupan Archbishop Socrates Villegas sa CBCP miingon nga dili mahimong patyon lang ang si bisan kinsa tungod lang sa rason nga lehitimo kining “self-defense” o pagpanalipod sa kinabuhi sa uban. “To kill a suspect outright, no matter how much surveillance work may have antecedently been done on the suspect, is not morally justified, matud pa niya sa pamahayag sa CBCP News website.

Nahingangha usab siya bahin sa paghatag og ganti tungod kay dali kini maabusohan ug supak kini sa moralidad nga modawat og ganti nga nakaingon sa kamatayon sa uban.

Sumala pa niya, “moral duty” sa tanang Kristiyano ang paghimo og mga lakang batok krimen apan di kinahanglang pinaagi sa ‘vigilantism’ kay mas maayo kun ipaagi kini subay sa balaod. (Jojo C. Ugdol ug Rene U. Borromeo, Decemay P. Padilla ug report gikan sa Wires/EIM)

Drug suspect napusilan

Usa ka gidudahang drug pusher ang napusilan sa mga polis human nisukol atol sa buy-bust operation nga niresulta sa pagkasakmit sa mokabat P472 mil nga kantidad sa gituohang shabu ug pagkasikop sa laing upat ka mga tawo diha sa Sitio Campo 2, Brgy. Jaclupan, Talisay City.

Si Supt. Germano Punay Mallari hepe sa Talisay City Police milusad og operasyon batok kang Leote Padigos, 38, residente sa maong dapit kinsa nakuhaan kini  og 40 gramos nga gituohang shabu, lighter ug kalibre .45 pistola nga expired na ang lisensiya,ug mga bala niini ug usa ka fragmentation grenade.

Si Padigos nakaangkon og samad pinusilan sa lawas ug sa ulo ug daling gidala sa Talisay City District Hospital apan tungod sa iyang kondisyon gibalhin kini sa Vicente Sotto Memorial Medical Center.

Matud pa dihang nakabantay si Padigos nga mga polis iyang katransaksyon ug nidagan kini sud sa ilang balay ug ila kining nakorner sa pansayan apan giingong nibunot kini og armas ug misuway pagpusil sa mga polis apan naunhan.

Gawas kaniya, nadakpan usab sila si Geneveve Gilluano Labado nga iyang kapuyo ug ang mga lalaking giingong nanuyop nga sila si Jabner Pepito Abellana, Alvin Nualla ug Julios Nolasco sa maong operasyon.

Matud ni PO3 Junyl Ater, desk officer sa Talisay Police Station nga notado na ang mga suspetsado sa maong lugar ug daghan na silang nadawat nga reklamo batok kanila.

Si Mallari nga nakahinabi sa Banat News mibutyag nga level 2 drug pusher na si Padigos ug dul-an usa ka buwan na nila kining gipanid-an.

Sa laing bahin, kapin P60 mil nga kantidad  sa  shabu ang nasakmit diha sa lungsod sa Pinamungajan nga miresulta sa pagkasikop ni Bernadeth “Nadet” Guerrero, 38, taga Brgy. Tutay sa maong lungsod.

Ang buy-bust operation gipanguluhan ni Insp. Gilfred Baroman kinsa mibutyag sa Banat News nga aduna nay kaso sa illegal nga drugas si Guerrero.

Usa ka dakong pakete may sud nga gituohang shabu nga nagkantidad og P60, 180 ang nasakmit gikan sa suspek kinsa gihulagway nga level 3 drug pusher. (BANAT NEWS)