Rehiyon ikatulo sa daghan og na-dengue

CEBU, Philippines - Ang Rehiyon 7 ikatulo na sa Pilipinas nga adunay  labing daghang kaso sa dengue, hinungdan ang Department of Health nangusog sa kampanya batok sa maong sakit karon sa rehiyon.

Usa ka information drive ang gihimo diha sa Mabolo Elementary School alang sa ASEAN Barangay Kontra Dengue aron dugangan pa ang mga impormasyon ug kahibalo sa publiko bahin sa maong makamatay nga sakit.

Base sa talaan sa Regional Epidemiology and Surveillance Unit, 158 porsiyento ang pagsaka karon sa kaso sa dengue sa Central Visayas kung ikomparar sa nilabay nga tuig sa susama nga buwan Enero ngadto sa buwan sa Hunyo.

Aduna nay 47 ang nakalas karong tuiga gikan sa 5,891 ka mga kaso sa dengue nga ilang natala, kun itandi sa nilabay nga tuig mas daghan karon ang namatay tungod kay 11 lamang ang nakalas ug 2,282 ka mga kaso sa samang mga buwan.

Matud pa ni OIC-Undersecretary Dr. Gerardo Bayugo tinguha nila nga bakunahan ang mga tinun-an sa grade 4  sa tanang pampublikong tulonghaan sa Central Visayas batok sa maong sakit. (BANAT NEWS)