Di mopadayon sa pag-resign

Dear Atty. Divine,

Nagtrabaho ko sa usa ka private firm diri sa Lapu-Lapu City. Nag-file ko og resignation last year, January 2015, pero giaprobahan nila karon lang May 2016, or kapin sa usa ka tuig una pa giaprobahan. Nagplano ko nga dili na lang modayon og resign. Valid pa ba ang ilang pag-approve nga dugay na man? -—Joel

Dear Joel,

Karon pa usab ko nakasugat niining imong kaso nga after sa kapin sa usa ka tuig una pa gi-approved ang imong resignation letter. Base sa atong Labor Code, ang usa ka empleyado mahimo nga moboluntaryo sa pag-resign sa iyang trabaho ug ang gikinahanglan lang niini mao ang 30-day notice ngadto sa iyang employer. Base kana sa Article 285 sa atong Labor Code nga nagkanayon : “(a) An employee may terminate without just cause the employee-employer relationship by serving a written notice on the employer at least one month in advance.

Buot ipasabot nga after a month sa imong pag-submit sa resignation letter mahimong dili na ikaw mo-report pa sa opisina ug dili gyud makapugos ang imong employer sa pagpatrabaho nimo kun di na gyud ka mo-report. Kun buot huna-hunaon, dili na magkinahanglan og approval ang imong resignation letter kay notice ra man na or pahibawo nga kutob ra ka nianang petsaha motrabaho sa maong kompaniya.

Ang maayo nimo nga buhaton karon kay nausab man ang imong huna-huna mao ang pagpakigsulti sa inyong HR labot sa imong tinguha nga dili mopadayon sa pag-resign. Imong sultian nga nakadesisyon ka nga dili na lang mopadayon sa pag-resign kay wala man dayon aprobahi ang imong resignation ug hangyoa lang ang imong kompaniya nga tugutan kang makapadayon sa pagtrabaho. - Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.