Taga UV modesinyo sa merkado sa Tabunok
CEBU, Philippines - Naglaraw si Talisay City Mayor-elect Eduardo Gullas sa paghangyo sa mga tinun-an sa arkitekto ug enhinyero sa University of the Visayas (UV) sa pagtabang sa desinyo sa tukuron nga bag-ong merkado sa Tabunok.
Ang merkado mahimutang sa 1.3 ektarya nga luna sa karaang nahimutangan niini ug lakip sa desinyo ang parkingan sa mga traysikol.
Matud ni Gullas nga plano niya nga tagaan og pahalipay o premyo ang tinun-an nga makahimo sa saktong desinyo nga ilang gipangita.
Giseguro ni Gullas nga kung masugdan na gani ang pagtukod sa bag-ong merkado hayan dili mabalaka ang mga manindahay kun asa sila mobalhin sa pagtinda tungod kay dili ra sila hilabtan sa ilang lugar tungod kay phase by phase ang pagtrabaho sa merkado.
Samtang ang Lagtang Public Market asoy ni Gullas nga himuon kini niyang technical-vocational school panahon nga siya na ang molingkod isip mayor sa dakbayan. (BANAT NEWS)
- Latest