‘Ewoks’ gipatay sa Tabunok
CEBU, Philippines - Patay diha-diha ang notadong snatcher human kini pusila sa wala mailhing mamumuno sa luyong bahin sa karaang merkado sa Tabunok, Dakbayan sa Talisay niadtong Biyernes sa kadlawon.
Ang biktima nailhan lang sa pangan nga si Ewoks, usa ka dispatcher nga nagsul-ob og puti nga jersey, itom ang T-shirt, kulot ang buhok ug adunay gitas-on nga lima ka tiil.
Si Supt. Germano Mallari, hepe sa kapolisan sa siyudad, niingon nga ang mga residente sa nahisgutang lugar nakadungog og duha ka masipang buto sa armas. Sa ilang pagsusi sa karsada, nagbuy-od na si Ewoks nga nagkadugo ug gigapos ang mga kamot niini.
Matud ni Mallari nga daw gihagbong lang ang biktima sa nahisgutang lugar dayun gipusil sa iyang lawas.
Gidala sa Talisay City District Hospital ang biktima apan gideklarar siya nga dead on arrival sa mga mananambal.
Nagkanayon si Mallari nga nailhan ang biktima nga usa ka dispatcher ug naila sab kini nga responsable sa pagpanguot ug snatching nga nahitabo sa merkado sa Tabunok.
"Nailhan gyud ning biktima nga notadong snatcher ug mangunguot diha sa merkado. Kasagarang biktima ani niya mga mangomprahay ug kadtong mga sumasakay sa pangpasaheroang jeep," matud ni Mallari.
Gitug-an ni Mallari nga posibleng daghan na ang nag-interes sa biktima tungod sa iyang dautang binuhatan. Hinuon padayon ang ilang pakisusi kun si kinsa ang responsable sa pagpatay sa biktima. (BANAT NEWS)
- Latest
