CICC planong himuong evacuation center
CEBU, Philippines - Magtigom karong umaabot nga Lunes ang sakop sa Provincial Disaster Risk Reduction and Management Office ug ingon man ang local disaster team sa Dakbayan sa Mandaue alang sa planong paghimo sa Cebu International Convention Center kon CICC aron himuong evacuation center sugod sa panahon sa ting-ulan.
Ang PDRRMO una na kining mipahigayon og assessment sa maong edipisyo ug base sa ilang pasiunang assessment, delikado gyud ang maong building sumala pang Baltazar Tribunalo, ang pangulo sa maong ahensya.
Matud pa nga delikado gyud ang tibuok CICC hilabina nga dili matag-an ang linog, ug gani natay-og kini ug naguba niadtong tuig 2013 diin naguba ang maong edipisyo.
Si Tribunalo miingon nga dili gyud mahimong tanang mga bakwit pasudlon sa CICC ug dili usab kini niya pasudlon sa bisag asa ra tungod sa naguba na nga estraktura.
Apan gitataw hinuon ni Tribunalo, nga mas maayo kung magagikan hinuon sa mga structural engineer ang assessment aron mahibaw-an ang kundisyon sa maong edipisyo.
Ang sakop sa provincial engineering office, mihimo usab og assessment sa CICC ug gikatakda nga ila kini ipresentar sa tigom karong Lunes.
Sa pagkakaron, magtinabangay ang mga kawani sa buhatan sa city health ug City Social Welfare sa dakbayan alang sa pag-atiman sa kahimtang sa mga biktima sa sunog nga temporaryo karong gipahiluna sa CICC.
Si Atty. Jamaal James Calipayan, executive secretary ni Mayor Jonas Cortes nga nahinabi sa mga tigbalita mibutyag nga naglaraw karon ang mayor nga magtukod og tulo ka 3-storey collapsible building.
Kini aron maoy ilang temporaryong papuy-an. Plano nila nga butangan kini og 45 ka lawak nga gigahinan og P72 milyones nga budget gikan sa City Disaster Risk Reduction And Management Office (CDRRMO) funds.
Si Engineer Andres Suson, officer-in-charge sa Mandaue City Engineers Office namahayag nga 1,533 pa ka tawo ang ilang ipahiluna.
Gibutyag usab nga 700 ka pamilya nga nag-abang ang hingpit na nga nanggawas sa CICC human usab nila madawat ang pinansiyal nga hinabang sa kagamhanan. (BANAT NEWS)
- Latest
