Dumpit mo-report na sa PRO7

CEBU, Philippines - Si SPO1 Adonis Dumpit kinahanglan pa nga makigkita sa mga directorial staff sa Police Regional Office-7 usa pa siya katugotan nga makigtagbo ni Chief Superintendent Patrocinio Comendador nga maoy katapusang mopirma aron siya makabalik sa serbisyo.

Gitataw ni Comendador nga makahimo na si Dumpit pagsul-ob pagbalik og police uniform sa pagsuroy niya sa lainlaing mga opisina diha sa Police Regional Office-7. Si Dumpit miingon nga ugmang adlawa mo-courtesy call siya kang Comendador didto sa Camp Sergio Osmeña Sr.

Apan kinahanglan pa niya nga moadto pag-una sa opisina sa Personnel Section, Operations Branch, Intelligence Division ug uban pang mga opisina.

Matud ni Comendador nga sa Personnel Section areglahon ang mga papeles ni Dumpit aron makabalik siya pag-aktibo sa serbisyo pagka polis, apan kinahanglan nga ang iyang dokumento pirmahan pa sa ubang mga directorial staff.

Si Comendador maoy katapusang mopirma sa dokumento ni Dumpit aron hingpit na siya nga maka-report pagbalik sa iyang mother unit nga mao ang Cebu City Police Office (CCPO).

Gitataw ni Comendador nga mahimong kaisyuhan na og armas si Dumpit kun makompleto na ang iyang mga gikinahanglang dokumento.

Samtang kabahin sa tinguha ni Mayor-elect Tomas Osmeña nga himuong bodyguard si Dumpit kun magsugod na siya paglingkod sa katungdanan karong Hulyo 1, si Comendador mitataw nga dili kini problema. Si Osmeña hinuon kinahanglan pa nga mohimo og hangyo ngadto sa kadagkoan sa kapolisan aron nga si Dumpit madestino nga iyang bodyguard. (BANAT NEWS)