3 napatay sa kapolisan

CEBU, Philippines - Tulo ka mga tawo, lakip ang usa ka gipasanginlang level 1 drug pusher nga nagbase kaniadto dinhi sa Sugbo ang  napatay ug usa ang samdan human sila gikatahong nisukol sa mga polis nga nilusad og gitawag og Operation Dark World  kagahapon sa kaadlawon diha sa Banacon Island sa Lungsod sa Getape, Bohol.

Ang nakalas naila nga sila si Rowen Secretaria "Alyas Yawa," usa ka level 1 drug pusher nga giingong taga Brgy. Pasil, Cebu City ug nalakip sa Top 10 nga Most Wanted ug duha ka mga lalaki nga wala pa mailhi.

Samtang ang nasamdan ug gidala sa Gallares Hospital sa Tagbilaran City giila nga si Ricardo Postolana, taga Calitaban Island, Talibon,  Bohol.

Matud pa ni Police Chief Superintendent Patrocinio Comendador Jr. ang rehiyonal nga direktor sa Police Regional Office-7 dugay na nilang gipanid-an si Secretaria kinsa nag-operate sa Sugbo ug sa Bohol may kalabutan sa drugas.

Sumala pa ni Comendador, ikatulo na kini ka higayon nga ilang gisuwayan pagsikop si Secretaria apan sa nakalabay nga duha ka operasyon idlas kini kaayo apan kagahapon sa kaadlawon naalirongan gyud kini   apan giingong nisukol kuyog sa mga kauban niini hinungdan nga sila napusilan. Dugang pa ni Comendador, idlas kaayo si Secretaria kay kanunay kining makaeskapo matag adunay operasyon tungod sa kadaghan sa mga tigpaniid niini bisan diha sa kadagatan.

Gitug-an ni Comendador, giplano pag-ayo sa mga sakop sa Regional Anti-Illegal Drugs Special Operation  Task Group 7, Regional Public Safety Battalion 7, Provincial Intelligence Branch-CPPO ug uban pa ang pagsikop ni Secretaria sulod sa tulo ka semana.

Matud pang Comendador dinagko ang operasyon ni Secretaria sa pagpayuhot niini og drugas. Nakuha gikan sa mga nangamatay ug sa naangol ang mga armas sama sa KG 9 submachine pistol, caliber 45, ug duha  ka .38 rebolber.

Padayon pa karon gihimo ang dugang imbestigasyon aron maila ang duha ka mga tawo nga nakalas ug lakip unya ang pakighinabi sa nahibiling buhi sa maong operation kinsa naa pa karon sa tambalanan.

Si Supt. George Ylanan mibutyag nga si alyas Yawa diha nag-operate kaniadto sa Pasil, apan tungod sa kakusog sa kampanya karon batok sa ilegal nga drugas nilayas kini ug diha na nagbase sa maong isla.

Si Mayor-elect Tomas Osmeña mipahibalo sa Banat News nga mohatag siya og P50 mil ngadto sa mga nakapatay ni alyas Yawa, ug dugangan pa kini kun maestablisar usab nga ang laing duha nga napatay taga dakbayan sa Sugbo usab. (BANAT NEWS)