DepEd, BFAR nangandam sa La Niña

CEBU, Philippines - Nangandam na ang Bureau of Fisheries and Aquatic Resources sa nagsingabot nga La Niña.

Gibutyag ni BFAR-7 Director Andres Bojos nga ilang gibantayan karon ang mga fishponds nga naa nahimutang duol sa mga suba aron dili mabanlas sa kusog nga baha.

Subling gipahimangnuan ang mga nanag-iya og fishponds nga palig-unon ug patas-an ang ilang mga palaisdaan.

Matud ni Bojos nga mas gibantayan nila ang La Niña kay makaapektar kini sa mga fishponds ang kusog nga bunok sa uwan nga posibleng mosulod sa isdaan. Ang BFAR andam motabang sa mga apektado pinaagi sa paghatag og semilya sa tilapia. Samtang andam na ang Department of Education sa pag-abot sa La Niña panahon sa tingklase matud ni Nenita Jaralve, division coordinator on sports and culture.

Gawas sa Brigada Eskwela karong Mayo 30, mangapod-apod usab ang DepEd og disaster kit nga naglakip sa flashlight, raincoat ug payong apan dili tanang eskwelahan ang mahatagan niini ug hatagan og prayoridad kadtong mas nagkinahanglan.

Matud ni Engr. Angel Custodio sa physical facilities section nga adunay mga gipalig-on nga building human sa bagyong Yolanda ug linog nga gitawag og calamity resilient school building nga mahimo usab nga himuong evacuation center kung adunay kalamidad.

Sa Dakbayan sa Sugbo, nangayo si acting Mayor Margarita Osmeña sa listahan sa panginahanglan sa City Disaster Risk Reduction and Management Office sa pagresponde sa katalagman.

Matud ni Osmeña nga dugay na siyang gustong masayud sa plano sa CCDRRMO aron ilang masuta kung unsay mga panginahanglanon apan hangtud karon wala pa gihapon siyay nadawat nga programa niini.

Si Osmeña gustong masayud kung kinsa ang mga job order employees nga mokabat sa 600 kabuok nga gibutang ubos sa disaster fund. Rowena D. Capistrano,   Le Phyllis F. Antojado ug Shaira D. Laude  (BANAT NEWS)