Upat ka Montero wa mabayri
CEBU, Philippines - Upat ka mga Mitsubishi Montero nga gipamalit sa Dakbayan sa Sugbo ug duha niini ang gipagamit na wala pa mabayari sumala pa ni acting mayor Margarita Osmeña.
Tungod niini, iyang giawhag ang tanang mga suppliers sa dakbayan nga mosunod sa unsay proseso.
Matud pa niya ang maong upat ka Montero wala pa mabayri ug wa mapirmahi ang Purchase Order niini nga nagkantidad og kapin sa usa ka milyon ka pesos matag usa.
Si Osmeña miingon nga nahibaw-an lang niya kini dihang iyang gimando ang pag-recall sa mga sakyanan nga giisyu sa siyudad sa nagkadaiyang departamento ug barangay.
Sumala pa nga ang purchase order wala pa mapirmahe ug wala pa mabayri apan gigamit na ang duha niini nila ni Dr. Ester Concha sa Department of Social Welfare and Services ug Atty. Collin Russel. Ang duha ka sakyanan nauli na hinuon alang sa inventory.
Gisusi pa ni Osmeña kun nahatud ba gayud ang upat ka Montero tungod kay wala pa man nila igkita ang laing duha niini ug wala usab sa listahan kung kinsay giisyuhan niini.
Si Osmeña miingon nga ang paghatud sa maong mga sakyanan diha sa siyudad nga wala mag-agi sa proseso usa ka warning sa mga suppliers.
Gibutyag usab ni Osmeña nga gawas sa Montero nga gigamit, duna pay duha ka Fortuners nga sakyanan nga para unta sa kapulisan apan gigamit kini nila ni Engr. Dionesio Gualiza ug City Treasurer Diwa Cuevas.
Hangtud karon, nagpaabot pa gihapon si Osmeña nga iuli sa mga kapitan ang mga sakyanan sa siyudad nga gipagamit kanila alang sa pag-imbentaryo.
Gipahibalo ni Osmeña, gikan kagahapon 225 ka mga sakyanan pa ang nauli, 83 ang motor , 52 na ang na re-issued ingon man ang 19 ka motorsiklo.
Apan 36 pa ka mga barangay ang wala niuli sa ilang mga service vehicles. Rowena D. Capistrano ug reports nila ni Aaron A. Sagaoinit ug Racshell N. Sanchez (BANAT NEWS)
- Latest
