10 positibo sa Amoeba
CEBU, Philippines - Napu ka tawo nga apil sa nangalanag human nikaun og fruit salad niadtong Lunes didto sa Brgy. Naalad, Siyudad sa Naga ang gikaingon nga positibo sa amoeba.
Si Dr. Andres Gestopa, Naga City Health Officer miingon nga nadawat na niya ang report sa Minglanilla District Hospital human ilang gi-eksamin ang mga hugaw sa napu ka mga biktima.
Ang mga pasyente nakasinati og pagkalibang, pagsuka ug mga pagpanakit sa tiyan ug hilanat.
Gipasabot ni Gestopa nga ang maong kagaw makuha gikan sa hugaw nga tubig ug kini makatakod.
Apan si Memorito Yanong, 45, kinsa maoy usa sa nihimo sa maong pagkaon negatibo sa amoebiasis.
Si Gestopa nagkanayon nga nihimo sila og pakisusi sa tubig nga gigamit sa mga biktima apil na ang ice cubes nga gigamit sa pagpabugnaw.
Ilahang giduso ngadto sa Provincial Health Office ang mga sampol aron sa dugang nga pagtuon.
Subli niya gipahimangnoan ang publiko nga imentinar ang kalimpyo sa pagpreparar sa pagkaon. (BANAT NEWS)
- Latest