Puya napunitan sa kasagingan
CEBU, Philippines - Nakit-an sa usa ka babaye ang masuso sa kasagingan sa Maya, Lungsod sa Daanbantayan niadtong Miyerkules sa buntag.
Si Tefanie Dublin, 25-anyos, padulong gawas sa luyo nga bahin sa ilang balay aron magtugway sa kanding dihang nakit-an niya ang usa ka plastic sando bag nga adunay naglihok. Didto nakit-an niya ang masuso nga nilagom na ang nawong nga nagsige og hilak ug anaa pa ang inunlan ug ang umbilical cord.
Alas 11 pa lang gabii sa Martes nagsige na og paghot ang ilang iro sa luyo sa ilang balay hangtud sa pagkabuntag walay hunong nga nagpaghot ang ilang iro hinungdan nga niduol si Dublin sa maong dapit ug nakit-an ang plastic.
Matud niya nga iyang giputos ang masuso sa tualya ug gidala sa mananabang apan tungod kay walay gamit ang mananabang gidala niya ang bata sa Rural Health Unit sa Daanbantayan.
Matod ni Heidie Aplece, social welfare officer sa Daanbantayan, nga pag-abot sa RHU giputol dayon ang umbilical cord sa masuso ug gidala sa Daanbantayan District Hospital.
Kagabii gidala ang bata sa Vicente Sotto Memorial Medical Center ug anaa na sa stable condition.
Matud ni Aplece nga kung mapagawas na ang bata, adto kini i-turnover sa Department of Social Welfare and Development-7 aron maatiman.
Giimbestigar pa sa kapolisan kung kinsa ang naglabay sa bata.
Ikaduha na kini nga higayon nga nakapunit si Dublin og bata duol sa ilang balay diin una niini niadtong Grade 4 pa siya ug ang bata nga gihulmigas na dihang nakit-an, karon 15-anyos na. (BANAT NEWS)
- Latest