P2M shabu nahipos sa kapolisan

CEBU, Philippines - Mokabat kapin sa P2 milyones nga kantidad sa gituohang shabu ang nasakmit sa mga sakop sa kapolisan sa managlahing operasyon dinhi sa Sugbo.

Ang mga sakop sa San Nicolas Police Station nironda sa Sitio Lawis, Pasil ning Dakbayan sa Sugbo ug nisikop nila ni Richard Bedua, alyas Etsay, 42, ug Alvin Abellar, 43.

Nakuha sa kapulisan gikan ni Bedua ang usa ka dakong putos, usa ka medium pack ug 63 ka mga gagmay nga pakete sa gituohang shabu, samtang gikan ni Abellar nakuha ang usa ka medium size ug 104 ka mga gagmay nga pakete.

Samtang pagkaalas 2:40 sa hapon nadakpan usab sa kapulisan si Raymund Luces, alyas Emot, 21, diha sa Rallos Street, Brgy.  Suba  ug nakuhaan kini og usa ka dakong putos, duha ka medium size ug 80 ka gagmay nga pakete sa gituohang shabu.

Sa kinatibuk-an mikabat sa P1,650,000  ang kantidad sa mga drugas nga nasakmit sa kapulisan. Ang hepe sa San Nicolas Police nga si Sr. Insp. Chuck Barandog nga nahinabi sa Banat News nagkanayon nga ang tulo apil sa listahan sa top 10 drug personalities sa ilang buhatan.

Sa laing operasyon, P250 mil nga kantidad sa shabu ug duha ka armas ang nasakmit gikan sa usa sa  gihulagway nga high profile drug personality sa dakbayan atol sa gipahigayong checkpoint sa Sitio Tagunol, Cogon.

Si Senior Police Officer 2 Emmanuel Flores, Desk Officer sa Pardo Police Station nga nahinabi sa Banat News miila sa suspek nga si Jason Rodriguez Legara, 40, lumad nga taga syudad sa Zamboanga ug kasamtangang nagpuyo sa Sitio Tayud, Basak-Pardo ning dakbayan.

Si Flores nagkanayon nga ang maong suspek sakay sa awto nga blue nga Nissan Sentra nga sakyanan.

Nakuhaan kini og lima ka pakete sa medium sized sa gituohang shabu, duha ka pusil nga .45 kalibre nga pistola nga adunay pito ka bala ug kalibre .9mm Parabellum Replica nga pulos walay lisensya ug P2 mil nga kantidad sa kwarta. Laing nadakpan mao ang duha ka gidudahang drug pusher ug tulo ka mga giingong nanuyop diha sa dalan Bonifacio, Brgy. Poblacion, Dakbayan sa Danao diin nasakmit usab ang mokabat sa P196, 824 nga kantidad sa shabu.

Si Police Officer 1 Eulyses dela Torre sa Danao City Police Station miila sa duha ka gipasanginlang drug pushers nga magsuong sila si Junnel Giva Batucan, 27 ug Rommel Giva Batucan, 25.

Ang duha nakuhaan og usa ka medium size nga shabu, 13 ka gagmay nga pakete, P200 nga buy-bust money ug P800 nga salapi nga gituohan halin sa drugas.

Apan  sa sulod sa panimalay sa mga dinakpan nasakpan sila si Carl Alconar Enriques,  40, Claudio Mata Galo,43, ug Roy Russel Sanchez nga gidudahang nanuyop og drugas ug nasakmitan og tagsa ka gagmay  nga paketeng shabu ug mga drug paraphernalia. Jojo Ugdol, Romeo T. Limpangog ug  Eramy E. Sismar (BANAT NEWS)