6 ka polis sa Tuburan drug protectors
CEBU, Philippines - Gusto karon nga subayon sa direktor sa Police Regional Office-7 ang alegasyon sa mayor sa lungsod sa Tuburan nga adunay unom ka mga polis sa iyang lungsod ang protector sa ilegal nga drugas.
Si Chief Supt. Patrocinio Comendador Jr. miisip nga seryoso ang maong alegasyon ug kinahanglan gyud nga susihon.
Si Tuburan Mayor Democrito “Aljun” Diamante nga unang nahinabi sa mga tigbalita miingon nga unom ka mga polis ang drug protector sa iyang lungsod .
Matud niya kining unom anaa sa “payroll” sa usa ka iladong drug pusher sa Tuburan mao nga gusto niya nga kining unom ibalhin og laing lungsod.
Miangkon hinuon siya nga wala siya’y kompletong mga pangalan sa maong mga polis.
Hinuon gipasabot ni Diamante nga bisan paman sa maong impormasyon kini miingon nga wala ra usab naghitak ang problema sa drugas sa iyang lungsod.
Nanghinaot usab si Diamante nga kung hingpit na nga molingkod pagka pangulo sa nasud si Rodrigo Duterte hingpit na usab nga mawala ang problema sa drugas.
Samtang si Comendador miingon nga gusto niyang masubay ang maong impormasyon kay aron mapasakaan og kaso kung kinsa man ang nalambigit niini. (BANAT NEWS)
- Latest
