Nangaligo sa lim-aw, pool nangalumos

CEBU, Philippines - Nilahos pagkaligo sa lim-aw sa Sitio Luksoon, Bonbon, Dakbayan sa Sugbo human nitubag sa sugo sa lawas ang nangalumos niadtong Huwebes sa gabii.

Ang mga nakalas mao sila si Walter Perez, 7, ug manghud nga si Jaysan Perez, 5-anyos, lumad sa maong lugar. Ang mga bata kuyog sa inahan nga si Maria Dan Helyn Perez, 27-anyos, nga nagkopras og lubi. Gitug-an sa inahan nga alas singko sa hapon sa maong adlaw nihangyo ang iyang anak nga lalaki nga malibang human nangaon og butong maong gikuyugan sa manghud dili layo sa ilang gikoprasan

Dako na lang nilang kahikurat nga alas 6 na sa gabii wala pa ang mga bata hinungdan nga ilang gisubay ug didto sa lim-aw nakita nila ang tsinelas sa bata sa managlahi nga lugar. Ang mga residente nagpakitabang sa command center sa Cebu City Disaster Risk Reduction and Management Office.

Nakit-an ang 5-anyos alas 11 sa gabii ug alas 12:59 na sa kadlawon kagahapon nakit-an usab nga nilutaw ang maguwang nga lalaki kinsa gituohang niluwas sa iyang manghud base sa pamorma niini.

Motungha na unta sa Grade 1 ang lalaki sa Bonbon Elementary School ug kinder usab ang babaye.

Si Harold Alcontin, pangulo sa CCDRRMO, nibutyag nga sa pagsugod sa ting-uwan natubigan ang lim-aw. Si acting Mayor Margarita Osmeña nipasalig nga makadawat og ayuda ang pamilya sa nakalas pinaagi sa burial assistance ug financial assistance.

Samtang patay nga nadala pa sa tambalanan ang 16-anyos nga lalaki nga malumos sa usa ka pangpublikong kaligoanan sa Sima, Poblacion, Lungsod sa Badian alas 11:40 sa buntag sa nakalabayng adlaw.

Ang nalumos giila nga si Arnel Sameon, nagpuyo sa Barangay Basiao.

Si Senior Police Officer 2 Ceremias Elardo, desk officer sa Badian Police Station nagkanayon nga ang batan-on niambak sa lawom hinungdan nga wala makatugkad ug nalumos. Matud ni Elardo nga ang swimming pool sumpay ra sa dagat hinungdan nga kung taob, motaas ang tubig. (BANAT NEWS)