DepEd division chief giunay sa sakop

CEBU, Philippines - Nagproblema ang pangulo sa Department of Education-Talisay City Division sa pagbalik sa iyang mga dokumento human ang iyang laptop gikawat.

Nidangop sa kapolisan si Dr. Leah Noveras, city schools division superintendent, niadtong Miyerkules sa buntag human iyang nadiskubrehan nga wala na ang iyang laptop nga adunay mga importanteng dokumento.

Siya nagkanayon nga wala niya igsapayan ang laptop tungod kay nagkantidad lang kini og P30 mil apan ang iyang gikagul-an ang mga   sulod  niini nga mga importante.

Matud pa ni Noveras nga gibiyaan ra niya ang laptop sa iyang opisina sa Barangay Poblacion samtang siya nibiyahe sa Dakbayan sa Davao aron sa pagtambong og seminar. Sa iyang pagbalik niadtong nilabay'ng mga adlaw wala na ang iyang laptop.

"Mo-go through legal process lang gyud mi kay wala man ta maka-akto og si kinsa gyud ang nagkuha. Ang ingon sa kapolisan nga ang tanang tawo nga makasulod ug gawas sa akong opisina mao gyud ang makonsiderar nga suspek," matud ni Noveras.

Nagdumili hinuon sa pagtug-an si Noveras sa pangan nga ilang gidudahan.

"Ang file lang gyud ato kay daghan kaayo to and it’s hard to get back na. Mura man gud nga it appears nga naa ra sulod sa opisina ang nagkuha," dugang ni Noveras.

Si Supt. Germano Mallari, hepe sa kapolisan sa dakbayan, niingon nga imbestigahan nila ang mga tawo nga mosulod ug gawas sa buhatan ni Noveras tungod kay wala silay laing gipangdudahan sa maong krimen.

Giklaro ni Mallari nga kun masakpan na nila kun si kinsa ang tawo nga nagkuha hayan pasakaan gyud nila og kaso. (BANAT NEWS)