Problema sa baha

CEBU, Philippines - Nangandam karon ang nagkadaiyang mga local government units nunot sa pagsulod na sa ting-uwan ug La Niña nga magdala usab og dili ordinaryong pagbunok sa uwan.

Dinhi sa Dakbayan sa Sugbo, aduna nay 18 ka bag-ong mga ambulansya  nga gipalit pagpangandam aron makatubag kun may emerhensiya karong ting-uwan.

Ang maong mga Suzuki APV nga ambulansiya nagkantidad og P16.3 milyones nga gikuha ngadto sa motor vehicle outlay sa Peace and Order program sa dakbayan.

Matud ni Ronald Malacora, assistant department head sa General Services Office nga wala pa matino kung kanus-a ug kinsa ang tugyanan sa maong mga ambulansya.

Si acting mayor Margarita Osmeña nagkanayon nga dapat ipaubos sa retraining ang mga paramedics ug rescuers sa siyudad ilabi na ang mga nurses ug drayber niini.

Sa laing bahin, si Harold Alcontin sa City Disaster Risk Reduction and Management Office nagkanayon nga andam na ang dakbayan sa pag-abot unya sa La Niña.

Si Alcontin nagkanayon nga ila na giandam ang mga evacuation centers nga gitagana alang sa mga maapektuhan unya sa katalagman nga dala sa La Niña. Sa laing bahin, laing 25 ka sakyanan ug duha ka motor ang gipang-uli sa mga departamento sa city hall ngadto sa GSO kagabii.

Samtang gikatakdang mouli og duha ka sakyanan si Brgy. Babag Kapitan Cesar Dolorito kagahapon sa hapon.

Matud ni Malacora, wala pa mahuman ang ilang inventory report sa mga sakyanan apan mibutyag nga isubasta na ang uban niini.

Sa laing bahin, ang Dakbayan sa Mandaue nimando na sa mga barangay kapitan nga palimpyohan ang mga kanal sa ilang lugar.

Si Atty. Jamaal Calipayan, city administrator sa Mandaue miingon nga niadtong nakalabay nga mga buwan, napasagdan ang mga kanal kay nangauga apan nagtipun-og diay ang mga basurang di malata.

Kini maoy hinungdan sa pag-awas sa baha dihang nibunok ang uwan sa Sitio Liong sa Brgy. Alang-Alang sa miaging adlaw.

Ilang gipasanginlan ang giugmad nga kanal sa dalan Plaridel nga naalihan kay matud nila wala man kini mahitabo bisan kusog ang uwan.

Si Engineer Myrna Dela Cerna nga maoy project engineer sa 6th Engineering District sa Department of Public Works and Highways (DPWH) 7 miingon nga mohimo sila og pakisusi  aron sulbaron ang maong problema.

Giangkon hinuon niyang aduna gyuy mga pagbaha nga masinati tungod sa ilang mga proyekto pagpalawom sa mga kanal ug  ang pagbutang og dagko nga mga imburnal. (BANAT NEWS)