Mga kapitan nangayo og clarification

CEBU, Philippines - Nagkahiusang niduol ang 28 ka kapitan sa barangay kang Cebu City Vice Mayor Edgar Labella labot sa gipa-blotter ni acting mayor Margot Osmeña nga kasong carnapping. Kini ang hinungdan nga nihimo og clarification letter si Labella alang kang Osmeña.

Matud ni Labella nga wala angkona sa mga barangay kapitan ang mga sakyanan nga gipagamit kanila sa Cebu City Hall alang sa mga emerhensiya isip patrol cars, paghatud og pasyente ug lubong ilabi na sa mga pobre nga constituents nga dili ka-afford og bayad.

Sumala pa ni Labella nga kung ang tumong sa pagpanguha sa mga sakyanan mao ang pag-imbentaryo, nihangyo siya ni Osmeña nga magpadala na lang kini og tawo ngadto sa barangay.

Sa iyang bahin si Phillip Zafra, pangulo sa Association of Barangay Councils, niingon usab nga wala nila angkona ang mga sakyanan ug wala gamita sa personal nga katuyuan.

Nihimo og clarification letter si Labella tungod kay nakabutang sa uwahing bahin sa memorandum letter ni Osmeña nga exempted sa pag-uli kadtong gigamit isip emergency cars.

Human nga makompleto na ang pirma sa kapin 40 ka barangay kapitan, ipadala na kini ni Labella ngadto kang Osmeña. (BANAT NEWS)