Palma andam moabi-abi ni Digong

CEBU, Philippines - Mahinangpon nga modawat si Cebu Archbishop Jose Palma kang incoming President Rodrigo Duterte kung mobisita kini kaniya.

Matud ni Palma nga bukas ang Simbahan sa pagpakigdiyalogo kang Duterte samtang siya nagatuo nga magkaabot ra ang kadagkuan sa duha ka habig aron pagtinabangay para sa kalambuan sa tanan.

Kini ilabi na kung ang sunod pangulo sa Catholic Bishops Conference of the Philippines mao ang Arsobispo sa Davao tungod kay mao man ang kasamtangang bise presidente.

Samtang gipahibawo sa Archdiocese sa Sugbo nga P130 milyones ang initial nga nagasto sa nilabay nga 51st International Eucharistic Congress niadtong nilabay Enero 24-31, 2016.

Sumala pa ni Auxiliary Bishop Dennis Villarojo, secretary-general sa 51st IEC, nga ilang gipanglantawan nga gasto sa IEC moabot og P262 milyones.

Hinuon nagpadayon pa ang pagpamayad sa mga balayronon ug nagpadayon sa paghuman sa mga trabahoon sa minor seminary. Nakakita sila og dili mominus sa P150 milyones sa fund raising ug sa registration sa mga partisipante.

Si Palma sa iyang bahin nipadayag nga wala sila magpaabot og dakung income sa IEC tungod kay mao ra man ang ilang tinguha nga adunay ginagmay nga proyekto human sa kalihukan ug mapalambo ang pagpakaylap sa eukaristiya.

Samtang karong Mayo 28, Sabado, sa alas 7:30 sa gabii, himuon ang paglusad sa 51st IEC commemorative book.

Sigun ni Dr. Jober Bersales, editor-in-chief sa maong libro, nga mapalit ang commemorative book sa kantidad nga P2,000 hangtud sa adlaw’ng Sabado ug kinahanglan nga magpareserba daan sanglit limited edition lang kini nga libro.

Si Father Jojo de Aquino, head sa documentation committee, niingon nga ang highlights sa libro mao ang mga panghitabo gyud sa IEC gikan sa unang adlaw hangtud natapos nga ginama ni Father Jo Quilongquilong, usa ka Jesuit nga pari. Rowena D. Capistrano ug Decemay P. Padilla (BANAT NEWS)