Komunikasyon maoy problema sa kapolisan

CEBU, Philippines - Problema sa komunikasyon ang nakita sa mga kadagkuan sa Police Regional Office-7 human gitestingan ang kapabilidad sa kapulisan sa Cebu City Police Office atol sa gipahigayong “simulation exercises” sa pagpanulis ug pagpang-hostage kagahapon.

Gibuhat kini diha sa usa ka financial establishment nga nahimutang sa Panganiban Street ning Dakbayan sa Sugbo kagahapon sa hapon.

Walo ka mga  ‘tulisan’ nga nagsakay sa usa ka van ug motorsiklo ang miatake sa Sheena Financial Corporation diin pipila ka mga tulisan ang misibat sakay sa ilang sakyanan ug ang uban nila nang-hostage.

Halos tulo ka minutos una pa naabot ang mga sakop sa CCPO, ang uban miplastar sa crime scene samtang aduna say nigukod sa misibat nga mga tulisan.

Atol sa pagpang-hostage dunay mi-negotiate samtang nagpaabot sa mga sakop sa Special Weapons and Tactics (SWAT) hangtod nga ilang gisulod ug na-neutralize sulod sa pipila ka minutos ang mga tulisan.

Atol sa maong kalihokan wala pahibaw-a ang mga police stations duol sa maong establisamento aron masukod gyud kun unsa sila kaandam. Kini mao ang Carbon Police Station ug Waterfront Police Station.

Matud pa ni Sr. Supt. Armando Radoc ang hepe sa Regional Operations and Plans Division sa Police Regional Office-7 gusto nilang makita kung unsa kapaspas, kaandam ang mga polis.

Lakip sa gitan-aw ang paagi, taktika, imbestigasyon  ug uban pa nga trabaho sa mga sakop sa Theft and Robbery Section, Crime Scene Investigation Unit, Homicide Section ug uban pang special units.

Nakita nga daghang kulang sa mga polis sa pagtubag sa maong alarma apan pulos kini makorihian.

Si Chief Supt. Patrocinio Comendador Jr., nagkanayon nga problema gayod sa komunikasyon   apan alang kaniya nagmalampuson kini kay nakorihian dayon. (BANAT NEWS)