DILG may pahimangno sa mga nakadaog

CEBU, Philippines - Mipahimangno karon  ang Department of Interior and Local Government (DILG) Province ngadto sa mga midaog nga kandidato niadtong eleksyon nga motuman sa mga rekisitos aron nga hingpit na makalingkod sa nadag-an nga posisyon.

Matud ni Jerome Gonzales ang local government operations officer diri sa probinsya sa Sugbo, nga kinahanglan silang moduso og Statement of Contribution and Expenditures (SOCE) ngadto sa Commission on Elections (Comelec).

Ang SOCE mao ang mopakita kun pilay nagasto sa usa ka kandidato atol sa iyang pangampanya.

Apil sa requirements nga kinahanglan mao ang pormal nga proklamasyon sa kandidato ug ingon man ang paghurar niini.

Dili usab angay kalimtan ang pagsumiter og Statement of Assets Liabilities and Net Worth (SALN) ngadto sa Office of the Ombudsman.

Kini aron masusi daan kun pila ang assets sa usa ka kandidato sa di pa siya molingkod sa posisyon ug makita kung resonable ba ang pagsaka sa iyang katigayonan sa paglabay sa panahon.

“For transparency. Kahibalo ang mga tawo kun unsay imong standing, ma-explain ra ba,” matud ni Gonzales.

Dugang niya nga bisan kun kahibalo na niini ang mga politiko, aduna gihapoy himuong orientation seminar ang DILG kalabot sa mga angay ug dili angay nga buhaton samtang nanerbisyo.

 “Panawagan nga before, during and after sa election dapat walay palta sa delivery of services,” dugang ni Gonzales. (BANAT NEWS)